SPREUKE 4

₁HOOR, julle seuns, na die tug van die vader, en luister om insig te leer ken;

₂want ek gee aan julle goeie lering, verlaat my onderwysing nie.

₃Want toe ek 'n seun was by my vader, teer en 'n enigste voor my moeder,

₄het hy my geleer en vir my gesê: Laat jou hart my woorde vashou; onderhou my gebooie, dan sal jy lewe.

₅Verkry wysheid, verkry insig; vergeet nie en wyk nie af van die woorde van my mond nie:

₆verlaat dit nie, dan sal dit jou bewaar; kry dit lief, dan sal dit jou bewaak.

₇Die beginsel van die wysheid is: Verwerf wysheid en verwerf insig deur al wat jy besit.

₈Hou dit hoog, dan sal dit jou verhoog; dit sal jou eer as jy dit omhels.

₉Dit sal 'n lieflike krans gee vir jou hoof, dit sal jou 'n sierlike kroon verskaf.

₁₀Hoor, my seun, en neem my woorde aan; dan sal die lewensjare vir jou vermeerder word.

₁₁In die weg van die wysheid onderrig ek jou, ek laat jou die spore van opregtheid betree;

₁₂as jy loop, sal jou treë nie belemmer word nie, en as jy hardloop, sal jy nie struikel nie.

₁₃Hou vas aan die tug, laat dit nie los nie; bewaar dit, want dit is jou lewe.

₁₄Kom nie op die pad van die goddelose en betree die weg van die slegtes nie.

₁₅Vermy dit, gaan nie daarop nie, wyk daarvan af en gaan verby;

₁₆want hulle kan nie slaap as hulle geen kwaad doen nie; en hulle slaap is weg as hulle nie tot 'n val bring nie.

₁₇Want hulle eet brood van goddeloosheid en drink wyn van gewelddadigheid.

₁₈Terwyl die pad van die regverdiges is soos die lig van die môreglans, wat al helderder word tot die volle dag toe,

₁₉is die weg van die goddelose soos duisternis: hulle weet nie waaroor hulle sal struikel nie.

₂₀My seun, luister na wat ek sê, neig jou oor tot my woorde,

₂₁laat hulle nie wyk uit jou oë nie, bewaar hulle binne-in jou hart.

₂₂Want hulle is die lewe vir die wat hulle vind, en 'n genesing vir hulle hele liggaam.

₂₃Bewaak jou hart meer as alles wat bewaar moet word, want daaruit is die oorspronge van die lewe.

₂₄Verwyder van jou die valsheid van mond, en hou ver van jou af die verkeerdheid van lippe.

₂₅Laat jou oë reguit kyk en jou ooglede hulle reg voor jou uit hou.

₂₆Maak die pad van jou voet gelyk, en laat al jou weë vas wees,

₂₇wyk nie regs of links af nie, hou jou voet ver van boosheid.