SPREUKE 22

₁'n NAAM is verkiesliker as groot rykdom, guns beter as silwer en as goud.

₂Rykes en armes ontmoet mekaar, die Here het hulle almal gemaak.

₃'n Skrander mens sien die onheil en verberg hom, maar die eenvoudiges gaan verder en word gestraf.

₄Die loon van nederigheid is die vrees van die Here, is rykdom en eer en die lewe.

₅Dorings, vangnette lê op die pad van die verkeerde; hy wat sy siel wil bewaar, bly ver weg daarvandaan.

₆Oefen die seun volgens die eis van sy weg; dan sal hy, ook as hy oud word, daar nie van afwyk nie.

₇Die ryke heers oor die armes, en hy wat leen, is 'n slaaf van die man wat uitleen.

₈Wie onreg saai, sal onheil maai; en die stok van sy grimmigheid sal verdwyn.

₉Wie vriendelik is, hy word geseën, omdat hy van sy brood aan die arme gee.

₁₀Dryf die spotter weg, dan gaan die twis weg; en die stryery en die geskimp hou op.

₁₁Hy wat reinheid van hart liefhet, wie se lippe aangenaam is — die koning is sy vriend.

₁₂Die oë van die Here bewaar kennis; daarom verydel Hy die woorde van die ontroue.

₁₃Die luiaard sê: Daar is 'n leeu buitekant; ek kan in die middel van die strate gedood word!

₁₄Die mond van die vreemde vroue is 'n diep kuil; hy op wie die Here vertoornd is, sal daarin val.

₁₅As die sotheid vassit in die hart van die seun, die tugroede sal dit daaruit verwyder.

₁₆Wie die arme verdruk, bevoordeel hom; hy wat aan die ryke gee, verarm hom net.

₁₇GEE gehoor en luister na die woorde van die wyse manne, en let op my kennis.

₁₈Want dit is lieflik as jy dit in jou binneste bewaar; mag hulle tesame gereed lê op jou lippe.

₁₉Dat jou vertroue op die Here mag wees, daarom onderwys ek jou vandag, ja, vir jou.

₂₀Het ek jou nie kernagtige spreuke voorgeskrywe met raadgewinge en kennis,

₂₁om jou bekend te maak waarheid, betroubare woorde, sodat jy woorde van waarheid kan antwoord aan die wat jou stuur nie?

₂₂Beroof die arme nie, omdat hy arm is, en verbrysel die ellendige nie in die poort nie.

₂₃Want die Here sal hulle saak verdedig en hulle berowers van die lewe berowe.

₂₄Verkeer nie met 'n driftige man nie, en met 'n opvlieënde man moet jy nie omgaan nie,

₂₅sodat jy nie gewend raak aan sy paaie en 'n strik vir jouself span nie.

₂₆Wees nie onder die wat 'n handslag gee, onder die wat vir skulde borg staan nie.

₂₇As jy nie het om te betaal nie, waarom sal hulle jou bed onder jou uit neem?

₂₈Die ou grenslyne wat jou vaders gemaak het, moet jy nie verlê nie.

₂₉Sien jy 'n man wat vaardig is in sy werk — hy kan voor konings staan, hy hoef nie voor geringes te staan nie.