SPREUKE 2

₁MY seun, as jy my woorde aanneem en my gebooie by jou bewaar,

₂sodat jy jou oor laat luister na wysheid, jou hart neig tot verstand;

₃ja, as jy na die insig roep, na die verstand jou stem verhef,

₄as jy daarna soek soos na silwer en dit naspeur soos verborge skatte,

₅dan sal jy die vrees van die Here verstaan en die kennis van God vind

₆(want die Here gee wysheid, uit sy mond kom kennis en verstand,

₇en Hy bewaar hulp vir die opregtes, Hy is 'n skild vir die wat regskape wandel

₈deurdat Hy die paaie van die reg bewaak en die weg van sy gunsgenote bewaar);

₉dan sal jy geregtigheid en reg verstaan en regverdigheid — elke goeie pad.

₁₀Want wysheid sal in jou hart kom, en kennis vir jou siel lieflik wees;

₁₁oorleg sal oor jou wag hou, verstand sal jou bewaak,

₁₂om jou te red van die weg van die slegte, van die mens wat valse dinge spreek;

₁₃van die wat die paaie van opregtheid verlaat om op weë van duisternis te wandel;

₁₄die wat hulle verheug in kwaaddoen, wat juig oor die valse streke van die slegte,

₁₅van wie die paaie verkeerd is, en wat afwyk in hulle spore;

₁₆om jou te red van die vreemde vrou, van die ontugtige wat met haar woorde vlei

₁₇(wat die vriend van haar jeug verlaat, en die verbond van haar God vergeet;

₁₈want haar huis sink weg na die dood en haar paaie na die skimme;

₁₉almal wat by haar ingaan, kom nie terug nie en bereik die paaie van die lewe nie)

₂₀sodat jy kan wandel op die weg van die goeies en die paaie van die regverdiges kan hou;

₂₁want die opregtes sal die land bewoon, en die regskapenes daarin oorbly,

₂₂maar die goddelose sal uit die land uitgeroei, en die ontroues sal daaruit weggeruk word.