MARKUS 8

₁IN dié dae toe daar 'n baie groot menigte was en hulle niks gehad het om te eet nie, het Jesus sy dissipels na Hom geroep en vir hulle gesê:

₂Ek voel innig jammer vir die skare, omdat hulle al drie dae by My bly en niks het om te eet nie.

₃En as Ek hulle honger huis toe stuur, sal hulle op die pad beswyk, want sommige van hulle kom van ver.

₄En sy dissipels antwoord Hom: Waarvandaan sal 'n mens hulle hier in die woestyn kan versadig met brood?

₅Toe vra Hy hulle: Hoeveel brode het julle? En hulle sê: Sewe.

₆En Hy gee aan die skare bevel om op die grond te gaan sit; daarop neem Hy die sewe brode, en nadat Hy gedank het, breek Hy dit en gee dit aan sy dissipels om dit voor te sit; en hulle sit dit aan die skare voor.

₇Hulle het ook 'n paar vissies gehad; en nadat Hy gedank het, sê Hy dat hulle dit ook moet voorsit.

₈En hulle het geëet en versadig geword en die oorskot van die brokstukke opgetel, sewe mandjies vol.

₉En die wat geëet het, was omtrent vierduisend. En Hy het hulle weggestuur.

₁₀EN dadelik het Hy met sy dissipels in die skuit geklim en in die streke van Dalmanúta gekom.

₁₁En die Fariseërs het uitgegaan en met Hom begin redetwis en van Hom 'n teken uit die hemel gevra om Hom te versoek.

₁₂Toe sug Hy swaar in sy gees en sê: Waarom begeer hierdie geslag 'n teken? Voorwaar Ek sê vir julle, aan hierdie geslag sal sekerlik geen teken gegee word nie.

₁₃En Hy het hulle verlaat en weer in die skuit geklim en na die oorkant gegaan.

₁₄En hulle het vergeet om brode saam te neem, en het net een brood by hulle in die skuit gehad.

₁₅En Hy het hulle beveel en gesê: Pas op, wees op julle hoede vir die suurdeeg van die Fariseërs en die suurdeeg van Herodes.

₁₆Toe redeneer hulle onder mekaar en sê: Dit is omdat ons geen brode het nie.

₁₇En Jesus merk dit en sê vir hulle: Waarom redeneer julle dat julle geen brode het nie? Begryp julle nie en verstaan julle nie? Het julle nog jul verharde hart?

₁₈Het julle oë en sien julle nie? En het julle ore en hoor julle nie?

₁₉En onthou julle nie toe Ek die vyf brode vir die vyfduisend gebreek het, hoeveel mandjies vol brokstukke julle opgetel het nie? Hulle sê vir Hom: Twaalf.

₂₀En die sewe vir die vierduisend — hoeveel mandjies vol brokstukke het julle opgetel? En hulle sê: Sewe.

₂₁Toe sê Hy vir hulle: Hoe verstaan julle dan nie!

₂₂EN Hy het in Betsáida gekom, en hulle het 'n blinde man na Hom gebring en Hom gesmeek om hom aan te raak.

₂₃Hy neem toe die blinde by die hand en lei hom uit buitekant die dorp; en nadat Hy in sy oë gespuug en hom die hande opgelê het, vra Hy hom of hy iets sien.

₂₄En hy kyk op en sê: Ek sien die mense, want ek sien hulle soos bome rondloop.

₂₅Daarna lê Hy weer die hande op sy oë en laat hom opkyk, en hy is herstel en het almal van ver af duidelik gesien.

₂₆En Hy het hom na sy huis gestuur en gesê: Moenie in die dorp gaan of dit aan iemand in die dorp vertel nie.

₂₇EN Jesus en sy dissipels het uitgegaan na die dorpe van Cesaréa-Filíppi; en op die pad vra Hy sy dissipels en sê vir hulle: Wie sê die mense is Ek?

₂₈En hulle antwoord: Johannes die Doper, en ander: Elía, en ander: Een van die profete.

₂₉En Hy sê vir hulle: Maar julle, wie sê julle is Ek? En Petrus antwoord en sê vir Hom: U is die Christus.

₃₀En Hy het hulle streng beveel om niemand van Hom te vertel nie.

₃₁Toe het Hy hulle begin leer dat die Seun van die mens baie moet ly en verwerp word deur die ouderlinge en owerpriesters en skrifgeleerdes en gedood word en ná drie dae opstaan.

₃₂En hierdie woord het Hy ronduit gespreek. En Petrus het Hom opsy geneem en Hom begin bestraf.

₃₃Maar Hy het Hom omgedraai, en terwyl Hy sy dissipels aankyk, het Hy Petrus bestraf en gesê: Gaan weg agter My, Satan! Want jy bedink nie die dinge van God nie, maar dié van die mense.

₃₄EN toe Hy die skare saam met sy dissipels na Hom geroep het, sê Hy vir hulle: Wie agter My aan wil kom, moet homself verloën en sy kruis opneem en My volg.

₃₅Want elkeen wat sy lewe wil red, sal dit verloor; maar elkeen wat sy lewe om My ontwil en om die evangelie ontwil verloor, hy sal dit red.

₃₆Want wat sal dit 'n mens baat as hy die hele wêreld win en aan sy siel skade ly?

₃₇Of wat sal 'n mens gee as losprys vir sy siel?

₃₈Want elkeen wat hom vir My en my woorde skaam in hierdie owerspelige en sondige geslag, vir hom sal die Seun van die mens Hom ook skaam wanneer Hy kom in die heerlikheid van sy Vader met die heilige engele.