MATTHÉÜS 4

₁TOE is Jesus deur die Gees weggelei die woestyn in om versoek te word deur die duiwel.

₂En nadat Hy veertig dae en veertig nagte gevas het, het Hy naderhand honger geword.

₃En die versoeker het na Hom gekom en gesê: As U die Seun van God is, sê dat hierdie klippe brode word.

₄Maar Hy antwoord en sê: Daar is geskrywe: Die mens sal nie van brood alleen lewe nie, maar van elke woord wat deur die mond van God uitgaan.

₅Toe neem die duiwel Hom saam na die heilige stad en laat Hom op die dak van die tempel staan

₆en sê vir Hom: As U die Seun van God is, werp Uself af; want daar is geskrywe: Hy sal sy engele bevel gee aangaande U, en hulle sal U op die hande dra, sodat U nie miskien u voet teen 'n klip stamp nie.

₇Jesus sê vir hom: Daar is óók geskrywe: Jy mag die Here jou God nie versoek nie.

₈Weer neem die duiwel Hom saam na 'n baie hoë berg en wys Hom al die koninkryke van die wêreld en hulle heerlikheid,

₉en sê vir Hom: Al hierdie dinge sal ek aan U gee as U neerval en my aanbid.

₁₀Toe sê Jesus vir hom: Gaan weg, Satan! want daar is geskrywe: Die Here jou God moet jy aanbid en Hom alleen dien.

₁₁Daarna het die duiwel Hom laat staan, en daar het engele gekom en Hom gedien.

₁₂EN toe Jesus hoor dat Johannes in die gevangenis gesit was, het Hy na Galiléa teruggegaan.

₁₃En Hy het Násaret verlaat en gaan woon in Kapérnaüm aan die see, in die gebied van Sébulon en Náftali,

₁₄sodat vervul sou word wat gespreek is deur Jesaja, die profeet, toe hy gesê het:

₁₅Die land Sébulon en die land Náftali, na die see toe, oorkant die Jordaan, Galiléa van die heidene —

₁₆die volk wat in duisternis sit, het 'n groot lig gesien, en die wat sit in die land en skaduwee van die dood, vir hulle het 'n lig opgegaan.

₁₇Van toe af het Jesus begin om te preek en te sê: Bekeer julle, want die koninkryk van die hemele het naby gekom.

₁₈En terwyl Jesus langs die see van Galiléa loop, sien Hy twee broers, Simon wat genoem word Petrus, en Andréas, sy broer, besig om 'n net in die see uit te gooi; want hulle was vissers.

₁₉En Hy sê vir hulle: Kom agter My aan, en Ek sal julle vissers van mense maak.

₂₀En hulle het dadelik die nette laat staan en Hom gevolg.

₂₁En toe Hy daarvandaan verder gaan, sien Hy twee ander broers, Jakobus, die seun van Sebedéüs, en Johannes, sy broer, in die skuit saam met hulle vader Sebedéüs, besig om hulle nette heel te maak; en Hy het hulle geroep.

₂₂En hulle het dadelik die skuit en hulle vader verlaat en Hom gevolg.

₂₃En Jesus het deur die hele Galiléa rondgegaan en in hulle sinagoges geleer en die evangelie van die koninkryk verkondig en elke siekte en elke kwaal onder die volk genees.

₂₄En die gerug aangaande Hom is versprei oor die hele Sírië; en hulle het na Hom gebring almal wat ongesteld was, wat gekwel was deur allerhande siektes en pyne en wat van duiwels besete was, en maansiekes en verlamdes; en Hy het hulle gesond gemaak.

₂₅En groot menigtes het Hom gevolg van Galiléa en Dekápolis en Jerusalem en Judéa en van oorkant die Jordaan af.