MATTHÉÜS 23

₁TOE het Jesus die skare en sy dissipels toegespreek

₂en gesê: Die skrifgeleerdes en die Fariseërs sit op die stoel van Moses.

₃Alles wat hulle dan vir julle mag sê om te onderhou, onderhou en doen dit; maar volgens hulle werke moet julle nie doen nie, want hulle praat en doen nie.

₄Want hulle bind pakke saam wat swaar en moeilik is om te dra, en sit dit op die skouers van die mense, maar self wil hulle dit nie met hulle vinger verroer nie.

₅En hulle doen al hul werke om deur die mense gesien te word, en hulle maak hul gedenkseëls breed en die some van hul klere groot.

₆En hulle hou van die voorste plekke by die maaltye en die voorste banke in die sinagoges

₇en die begroetinge op die markte en om deur die mense genoem te word: Rabbi, Rabbi!

₈Maar julle, laat jul nie Rabbi noem nie, want een is julle leermeester: Christus, en julle is almal broeders.

₉En julle moet niemand op die aarde julle vader noem nie, want een is julle Vader, Hy wat in die hemele is.

₁₀Julle moet julle ook nie leermeesters laat noem nie, want een is julle leermeester: Christus.

₁₁Maar die grootste van julle moet jul dienaar wees.

₁₂Wie homself verhoog, sal verneder word, en wie homself verneder, sal verhoog word.

₁₃Maar wee julle, skrifgeleerdes en Fariseërs, geveinsdes, want julle sluit die koninkryk van die hemele toe voor die mense; want julle gaan self nie in nie, en die wat sou ingaan, laat julle nie toe om in te gaan nie.

₁₄Wee julle, skrifgeleerdes en Fariseërs, geveinsdes, want julle eet die huise van die weduwees op, en doen vir die skyn lang gebede. Daarom sal julle 'n swaarder oordeel ontvang.

₁₅Wee julle, skrifgeleerdes en Fariseërs, geveinsdes, want julle trek rond oor see en land om een bekeerling te maak; en as hy dit geword het, maak julle hom 'n kind van die hel, twee maal erger as julle self.

₁₆Wee julle, blinde leiers, julle wat sê: Elkeen wat sweer by die tempel — dit is niks nie; maar elkeen wat sweer by die goud van die tempel, hy is gebonde.

₁₇Julle dwase en blindes, want wat is meer: die goud, of die tempel wat die goud heilig?

₁₈En: Elkeen wat sweer by die altaar — dit is niks nie; maar elkeen wat sweer by die gawe daar bo-op, hy is gebonde.

₁₉Julle dwase en blindes, want wat is meer: die gawe, of die altaar wat die gawe heilig?

₂₀Wie dan sweer by die altaar, sweer dáárby en by alles wat daarop is;

₂₁en wie sweer by die tempel, sweer dáárby en by Hom wat daarin woon;

₂₂en wie sweer by die hemel, sweer by die troon van God en by Hom wat daarop sit.

₂₃Wee julle, skrifgeleerdes en Fariseërs, geveinsdes, want julle gee tiendes van kruisement en anys en koljander, en die swaarste van die wet laat julle ná: die reg en die barmhartigheid en die trou. Hierdie dinge behoort julle te doen sonder om die ander na te laat.

₂₄Blinde leiers, julle wat die muggie uitsif, maar die kameel insluk!

₂₅Wee julle, skrifgeleerdes en Fariseërs, geveinsdes, want julle maak die buitekant van die beker en die skottel skoon, maar binnekant is dit vol roof en onmatigheid.

₂₆Blinde Fariseër, maak eers die binnekant van die beker en die skottel skoon, sodat ook die buitekant daarvan skoon kan word.

₂₇Wee julle, skrifgeleerdes en Fariseërs, geveinsdes, want julle is net soos gewitte grafte wat van buite wel fraai lyk, maar van binne vol doodsbene en allerhande onreinheid is.

₂₈So lyk julle ook van buite vir die mense wel regverdig, maar van binne is julle vol geveinsdheid en ongeregtigheid.

₂₉Wee julle, skrifgeleerdes en Fariseërs, geveinsdes, want julle bou die grafte van die profete en versier die grafstene van die regverdiges;

₃₀en julle sê: As ons in die dae van ons vaders geleef het, sou ons geen deel met hulle gehad het aan die bloed van die profete nie.

₃₁Julle gee dus teen julself getuienis dat julle kinders is van die wat die profete vermoor het.

₃₂Maak die maat van julle vaders dan vol!

₃₃Slange, addergeslag, hoe sal julle die oordeel van die hel ontvlug?

₃₄Daarom, kyk, Ek stuur profete en wyse manne en skrifgeleerdes na julle toe, en julle sal sommige van hulle doodmaak en kruisig en sommige van hulle in jul sinagoges gésel en van die een stad na die ander vervolg,

₃₅sodat oor julle kan kom al die regverdige bloed wat vergiet is op die aarde, van die bloed van die regverdige Abel af tot op die bloed van Sagaría, die seun van Berégja, wat julle vermoor het tussen die tempel en die altaar.

₃₆Voorwaar Ek sê vir julle, al hierdie dinge sal oor hierdie geslag kom.

₃₇Jerusalem, Jerusalem, jy wat die profete doodmaak en stenig dié wat na jou gestuur is, hoe dikwels wou Ek jou kinders bymekaarmaak net soos 'n hen haar kuikens onder die vlerke bymekaarmaak, en julle wou nie!

₃₈Kyk, julle huis word vir julle woes gelaat!

₃₉Want Ek sê vir julle: Julle sal My van nou af sekerlik nie sien nie totdat julle sal sê: Geseënd is Hy wat kom in die Naam van die Here!