MATTHÉÜS 1

₁DIE geslagsregister van Jesus Christus, die seun van Dawid, die seun van Abraham:

₂Abraham was die vader van Isak, en Isak die vader van Jakob, en Jakob die vader van Juda en sy broers;

₃en Juda was die vader van Peres en Serag by Tamar, en Peres was die vader van Hesron, en Hesron die vader van Ram,

₄en Ram die vader van Ammínadab, en Ammínadab die vader van Nagson, en Nagson die vader van Salmon,

₅en Salmon die vader van Boas by Ragab, en Boas die vader van Obed by Rut, en Obed die vader van Ísai,

₆en Ísai die vader van koning Dawid, en koning Dawid die vader van Salomo by die vrou van Uría,

₇en Salomo die vader van Rehábeam, en Rehábeam die vader van Abía, en Abía die vader van Asa,

₈en Asa die vader van Jósafat, en Jósafat die vader van Joram, en Joram die vader van Ussía,

₉en Ussía die vader van Jotam, en Jotam die vader van Agas, en Agas die vader van Hiskía,

₁₀en Hiskía die vader van Manasse, en Manasse die vader van Amon, en Amon die vader van Josía,

₁₁en Josía die vader van Jegónia en sy broers in die tyd van die Babiloniese ballingskap.

₁₂En ná die Babiloniese ballingskap het Jegónia die vader geword van Seáltiël, en Seáltiël was die vader van Serubbábel,

₁₃en Serubbábel die vader van Abíud, en Abíud die vader van Éljakim, en Éljakim die vader van Asor,

₁₄en Asor die vader van Sadok, en Sadok die vader van Agim, en Agim die vader van Elíud,

₁₅en Elíud die vader van Eleásar, en Eleásar die vader van Mattan, en Mattan die vader van Jakob,

₁₆en Jakob die vader van Josef, die man van Maria uit wie gebore is Jesus wat Christus genoem word.

₁₇Al die geslagte dan van Abraham tot Dawid is veertien geslagte, en van Dawid tot die Babiloniese ballingskap veertien geslagte, en van die Babiloniese ballingskap tot Christus veertien geslagte.

₁₈DIE geboorte van Jesus Christus was dan só: Toe sy moeder Maria verloof was aan Josef, voordat hulle saamgekom het, is sy swanger bevind uit die Heilige Gees.

₁₉En Josef, haar man, omdat hy regverdig was en onwillig om haar openbaar te maak, het hom voorgeneem om in die geheim van haar te skei.

₂₀Maar terwyl hy dit in die gedagte gehad het, verskyn daar 'n engel van die Here in 'n droom aan hom en sê: Josef, seun van Dawid, wees nie bevrees om Maria, jou vrou, by jou te neem nie, want wat in haar verwek is, is uit die Heilige Gees;

₂₁en sy sal 'n seun baar, en jy moet Hom Jesus noem, want dit is Hy wat sy volk van hulle sondes sal verlos.

₂₂En dit het alles gebeur, sodat die woord vervul sou word wat die Here deur die profeet gespreek het:

₂₃Kyk, die maagd sal swanger word en 'n seun baar, en hulle sal Hom Emmánuel noem, dit is, as dit vertaal word: God met ons.

₂₄En toe Josef uit die slaap wakker word, het hy gedoen soos die engel van die Here hom beveel het en sy vrou by hom geneem;

₂₅en hy het haar nie beken totdat sy haar eersgebore Seun gebaar het nie; en hy het Hom Jesus genoem.