KLAAGLIEDERE 3

₁Alef. EK is die man wat ellende gesien het deur die roede van sy grimmigheid.

₂My het Hy gelei en laat wandel in duisternis sonder lig.

₃Ja, altyd weer draai Hy die hele dag sy hand teen my.

₄Bet. Hy het my vlees en my vel laat wegteer, my gebeente verbreek.

₅Hy het my met 'n bouwerk omsingel van gif en moeite.

₆Hy het my in donker plekke laat sit soos die wat lankal dood is.

₇Gimel. Hy het my toegemuur, sodat ek nie kan uitkom nie, my koperboeie swaar gemaak.

₈Al skreeu ek ook en al roep ek om hulp, Hy laat my gebed onverhoord.

₉Hy het my weë toegemuur met gekapte klip, my paaie onbegaanbaar gemaak.

₁₀Dalet. Hy is 'n beer wat my voorlê, 'n leeu in skuilplekke.

₁₁Hy het my weë laat wegdraai en my verskeur, my tot 'n woesteny gemaak.

₁₂Hy het sy boog gespan en my as 'n teiken vir die pyl opgestel.

₁₃He. Hy het die pyle uit sy pylkoker in my niere laat ingaan.

₁₄Ek het 'n belagging geword vir my hele volk, hulle spotlied die hele dag.

₁₅Hy het my met bitter kruie versadig, my genoeg wildeals laat drink.

₁₆Wau. En Hy het my die tande op gruisklippertjies laat stukkend byt, my in die as neergedruk.

₁₇En U het my siel van die vrede verstoot, ek het die goeie vergeet.

₁₈Ja, ek het gesê: My roem het vergaan en my hoop op die Here.

₁₉Sajin. Dink aan my ellende en my omswerwing, aan die wildeals en die gif.

₂₀As my siel terdeë daaraan dink, buig hy hom neer in my.

₂₁Dit sal ek ter harte neem, daarom sal ek hoop:

₂₂Get. dit is die goedertierenhede van die Here dat ons nie omgekom het nie, want sy barmhartighede het geen einde nie;

₂₃hulle is elke môre nuut; u trou is groot.

₂₄Die Here is my deel, sê my siel, daarom sal ek op Hom hoop.

₂₅Tet. Goed is die Here vir die wat op Hom hoop, vir die siel wat Hom soek.

₂₆Dit is goed om in stilheid te hoop op die hulp van die Here.

₂₇Dit is goed vir 'n man dat hy die juk in sy jeug dra.

₂₈Jod. Laat hom eensaam sit en swyg, as Hy hom dit opgelê het.

₂₉Laat hy sy mond in die stof steek — miskien is daar hoop!

₃₀Laat hy die wang gee vir die wat hom slaan, laat hy genoeg kry van smaad.

₃₁Kaf. Want die Here sal nie vir ewig verstoot nie.

₃₂Maar as Hy bedroef het, ontferm Hy Hom na die grootheid van sy goedertierenhede;

₃₃want nie van harte verdruk of bedroef Hy die mensekinders nie.

₃₄Lamed. Dat hulle al die gevangenes van die aarde onder hul voete vertrap,

₃₅dat hulle die reg van 'n man verdraai voor die aangesig van die Allerhoogste,

₃₆dat hulle 'n mens onregverdig behandel in sy regsaak — het die Here dit nie gesien nie?

₃₇Mem. Wie spreek daar, en dit gebeur? Het die Here dit nie beveel nie?

₃₈Gaan uit die mond van die Allerhoogste nie kwaad sowel as goed nie?

₃₉Wat klaag 'n mens in sy lewe? Laat elkeen klaag oor sy sondes.

₄₀Noen. Laat ons ons weë naspeur en deursoek en ons tot die Here bekeer;

₄₁laat ons ons hart saam met die hande ophef tot God in die hemel en sê:

₄₂Óns het oortree en ons was wederstrewig — Ú het nie vergewe nie.

₄₃Samek. U het U in toorn gehul en ons agtervolg, U het gedood sonder verskoning.

₄₄U het Uself in 'n wolk gehul, sodat daar geen gebed kon deurdring nie;

₄₅U het ons 'n uitvaagsel en 'n wegwerpsel onder die volke gemaak.

₄₆Pe. Al ons vyande het hulle mond teen ons oopgerek;

₄₇skrik en kuil het ons deel geword, ondergang en verbreking.

₄₈My oog loop af in waterstrome oor die verbreking van die dogter van my volk.

₄₉Ajin. My oog vloei rusteloos weg sonder ophou,

₅₀totdat die Here uit die hemel neersien en aanskou.

₅₁My oog gee my pyn oor al die dogters van my stad.

₅₂Sade. Hulle het my soos 'n voël rondgejaag, die wat sonder oorsaak my vyande is;

₅₃hulle het my lewe in 'n kuil tot niet gemaak en klippe op my gegooi.

₅₄Water het oor my hoof gestroom, ek het gesê: Dit is klaar met my!

₅₅Kof. Ek roep u Naam aan, Here, uit die onderste kuil.

₅₆U hoor my stem; verberg u oor nie vir my ontboeseming, vir my hulpgeroep nie.

₅₇U kom nader die dag as ek U aanroep, U sê: Wees nie bevrees nie!

₅₈Resj. U, Here, verdedig my regsaak, U verlos my lewe.

₅₉U sien, Here, my verdrukking; verskaf my tog reg.

₆₀U sien al hulle wraaksug, al hulle planne teen my.

₆₁Sjin. U hoor hulle smaadrede, Here, al hulle planne teen my,

₆₂die lippe van my teëstanders en hulle bedenksels die hele dag teen my.

₆₃Aanskou tog hulle sit en hulle opstaan, ek is hulle spotlied.

₆₄Tau. U sal hulle vergeld vir wat hulle gedoen het, Here.

₆₅U sal hulle gee verblinding van hart, u vervloeking oor hulle.

₆₆U sal hulle in toorn vervolg en hulle verdelg van onder die hemel van die Here uit.