JOB 40

₁EN die Here het Job uit 'n storm geantwoord en gesê:

₂Gord tog jou heupe soos 'n man; Ek sal jou ondervra en onderrig jy My.

₃Wil jy werklik my reg verbreek, My veroordeel, dat jy gelyk kan hê?

₄Het jy dan 'n arm soos God? En kan jy donder met die stem soos Hy?

₅Versier jou tog met heerlikheid en hoogheid, en beklee jou met majesteit en glorie!

₆Giet jou toorn in strome uit; en kyk na alles wat hoog is, en verneder dit.

₇Kyk na alles wat hoog is, onderwerp dit; en werp die goddelose neer daar waar hulle staan.

₈Begrawe hulle almal saam in die stof; sluit hulle aangesigte in 'n verborge plek weg.

₉Dan sal ook Ek jou loof, omdat jou regterhand jou die oorwinning gee.

₁₀Kyk, daar is die seekoei wat Ek gemaak het saam met jou. Gras eet hy soos 'n bees.

₁₁Kyk tog, sy krag is in sy kruis, en sy sterkte in die spiere van sy buik.

₁₂Hy hou sy stert reguit soos 'n seder; die senings van sy dye is inmekaar gevleg.

₁₃Sy gebeente is pype van koper, sy bene soos stawe van yster.

₁₄Hy is die eersteling van die weë van God; Hy wat hom gemaak het, het hom sy swaard verskaf.

₁₅Want die berge lewer vir hom voer, en al die wilde diere van die veld speel daar.

₁₆Onder lotusbome lê hy, in 'n skuilplek van riete en moeras.

₁₇Lotusbome oordek hom as sy skaduwee, die rivierwilgers omring hom.

₁₈As die rivier swel — hy word nie verskrik nie; hy voel gerus, ook al bruis 'n Jordaan teen sy mond.

₁₉Sal 'n mens hom gryp terwyl hy jou aankyk, met vangtoue sy neus deurboor?

₂₀Kan jy die krokodil met 'n hoek uittrek? En met 'n tou sy tong afdruk?

₂₁Kan jy 'n tou van biesies in sy neus sit? En sy kakebeen met 'n haak deurboor?

₂₂Sal hy jou baie smeek? Of met jou spreek in sagte woorde?

₂₃Sal hy 'n verbond met jou sluit, dat jy hom vir altyd as slaaf aanneem?

₂₄Sal jy met hom soos met 'n voëltjie speel? En hom vasbind vir jou meisiekinders?

₂₅Sal die viskopers met hom handel drywe, hom verdeel onder die koopmans?

₂₆Kan jy sy vel vol skerp ysters steek, en met 'n vissersharpoen sy kop?

₂₇Sit jou hand op hom; dink aan die geveg; jy sal dit nie weer doen nie.

₂₈Kyk, elke hoop kom bedroë uit: sal 'n mens nie reeds by die sien van hom neerslaan nie?