JOB 37

₁JA, hiervoor beef my hart en spring op uit sy plek.

₂Luister, luister na die gedruis van sy stem en die dreuning wat uit sy mond uitgaan.

₃Onder die ganse hemel laat Hy dit los en sy lig oor die eindes van die aarde.

₄Daarna brul sy stem, Hy donder met sy stem vol majesteit en hou die bliksems nie terug as sy stem gehoor word nie.

₅God donder wonderbaar met sy stem; Hy doen groot dinge wat vir ons onbegryplik is.

₆Want Hy gebied die sneeu: Val op die aarde! Ook die stortreën, ja, sy geweldige stortreëns.

₇Hy verseël die hand van elke mens in die winter, sodat tot kennis kan kom al die mense wat Hy gemaak het.

₈Dan gaan die wilde diere in skuilhoeke en bly in hulle lêplekke.

₉Uit sy kamer kom die stormwind, en deur die wolkverstrooiers koue.

₁₀Deur die asem van God word ys gegee, en die wye waters lê vas in die engte.

₁₁Ja, met volheid van water belas Hy die wolke, en Hy strooi ver en wyd sy ligtende wolk;

₁₂en dit skiet oral rond volgens sy bestel, sodat hulle alles doen wat Hy hulle beveel oor die wye wêreldrond:

₁₃òf tot 'n tugroede, òf tot nut van sy aarde, òf tot weldadigheid laat Hy dit sy doel vind.

₁₄LUISTER hierna, o Job! Staan stil en gee ag op die wonders van God.

₁₅Begryp u hoe God hulle bevel gee en die lig van sy wolk laat flikker?

₁₆Begryp u iets van die gesweef van die wolke, van die wonders van die Volmaakte in kennis?

₁₇U, wie se klere warm word as die aarde stil is vanweë die suidewind —

₁₈kan u saam met Hom die hemel uitbrei wat vas is soos 'n gegote spieël?

₁₉Onderrig ons wat ons aan Hom moet sê: ons kan niks voorbring vanweë die duisternis nie.

₂₀Moet dit Hom vertel word dat ek wil spreek? Of het iemand ooit gesê dat hy vernietig wil word?

₂₁En nou, 'n mens kan die lig nie aansien wat helder is in die hemel as die wind verbygegaan en dit skoongemaak het nie.

₂₂Uit die Noorde kom goud te voorskyn, maar oor God is daar ontsagwekkende majesteit.

₂₃Die Almagtige — ons vind Hom nie; Hy is groot van krag, maar die reg en die volheid van geregtigheid krenk Hy nie.

₂₄Daarom vrees die mense Hom; almal wat eiewys is, sien Hy nie aan nie.