JESAJA 32

₁KYK, 'n koning sal regeer in geregtigheid, en die vorste sal heers volgens reg.

₂En elkeen sal wees soos 'n toevlug teen die wind en 'n skuiling teen die stortreën, soos waterstrome in 'n dor streek, soos die skaduwee van 'n swaar rots in 'n land wat versmag.

₃Dan sal nie meer verblind wees die oë van die wat sien nie; en die ore van hulle wat hoor, sal luister;

₄en die hart van die onbedagsames sal leer om te verstaan, en die tong van die hakkelaars sal gou wees om duidelik te spreek;

₅die dwaas sal nie meer 'n edele genoem word nie, en van die skelm sal nie gesê word dat hy vernaam is nie.

₆Want 'n dwaas spreek dwaasheid en sy hart bring onheil voort, deur goddeloosheid te bedrywe en dwaling te spreek oor die Here, deur die begeerte van die hongerige onvervuld te laat en die drank van die dorstige te laat ontbreek.

₇En die skelm — sy middele is sleg, hý beraam skandelike dade om die ellendiges te ruïneer met leuentaal, ook as die behoeftige spreek wat reg is.

₈Maar die edele beraam edele dade, en hý hou stand in wat edel is.

₉STAAN op, geruste vroue, hoor my stem! Sorgelose dogters, luister na my woord!

₁₀'n Jaar en 'n paar dae — en julle sal sidder, sorgelose dogters! Want dit is gedaan met die druiwe-oes, daar sal geen insameling van vrugte kom nie.

₁₁Bewe, geruste vroue! Sidder, sorgelose dogters! Trek julle uit, ontbloot julle en gord rougewade om julle lendene.

₁₂Hulle slaan op die bors vanweë die begeerlike velde, vanweë die vrugbare wingerdstok;

₁₃vanweë die akkers van my volk wat met dorings en distels opskiet, ja, vanweë al die huise van vreugde van die uitgelate stad.

₁₄Want die paleis is verlate, die stadsgewoel is in eensaamheid verander; die Heuwel en die Wagtoring dien as spelonke vir ewig, 'n vreugde vir die wilde-esels, 'n weiveld vir die troppe vee —

₁₅totdat oor ons uitgegiet word die Gees uit die hoogte; dan word die woestyn 'n vrugteboord, en die vrugteboord self word vir 'n bos gereken.

₁₆En die reg woon in die woestyn, en die geregtigheid hou verblyf in die vrugteboord.

₁₇En die werking van die geregtigheid sal vrede wees, en die voortbrengsel van die geregtigheid rus en veiligheid tot in ewigheid.

₁₈En my volk sal woon in 'n plek van vrede en in veilige wonings en in plekke van ongestoorde rus.

₁₉Maar dit sal hael as die bos inmekaarstort en die stad wegsak in die laagte.

₂₀Welgeluksalig is julle wat by alle waters saai, wat die voet van os en esel vry laat loop!