GÉNESIS 21

₁EN die Here het Sara besoek soos Hy beloof het; en die Here het aan Sara gedoen soos Hy gespreek het:

₂Sara het bevrug geword en vir Abraham in sy ouderdom 'n seun gebaar op die bepaalde tyd wat God genoem het.

₃En Abraham het sy seun wat vir hom gebore is, wat Sara vir hom gebaar het, Isak genoem.

₄En Abraham het sy seun Isak besny toe hy agt dae oud was, soos God hom beveel het.

₅En Abraham was honderd jaar oud toe sy seun Isak vir hom gebore is.

₆En Sara het gesê: 'n Gelag het God my berei: elkeen wat dit hoor, sal oor my lag.

₇Verder sê sy: Wie kon ooit aan Abraham voorspel het: Sara soog kinders? Want ek het 'n seun gebaar in sy ouderdom.

₈En die kind het opgegroei en is gespeen. En Abraham het 'n groot maaltyd berei op die dag toe Isak gespeen is.

₉Toe sien Sara hoe die seun van Hagar, die Egiptiese slavin, wat sy vir Abraham gebaar het, spot;

₁₀en sy sê aan Abraham: Jaag hierdie slavin en haar seun weg, want die seun van hierdie slavin mag nie saam met my seun Isak erwe nie.

₁₁En die woord was baie verkeerd in die oë van Abraham vanweë sy seun.

₁₂Maar God het aan Abraham gesê: Laat dit nie verkeerd wees in jou oë ter wille van die seun en van jou slavin nie. Luister na Sara in alles wat sy van jou verlang, want deur Isak sal daar vir jou 'n nageslag genoem word.

₁₃Maar Ek sal ook die seun van die slavin tot 'n nasie maak, omdat hy jou kind is.

₁₄Toe is Abraham die môre vroeg op, en hy het brood en 'n sak met water geneem en dit aan Hagar gegee deur dit op haar skouer te sit, en ook die kind, en haar weggestuur. Sy het toe weggegaan en rondgedwaal in die woestyn van Berséba.

₁₅En toe die water in die sak op was, het sy die kind onder een van die bosse neergewerp

₁₆en geloop en op 'n afstand gaan sit so ver as 'n boog kan skiet; want sy het gesê: Ek wil die dood van die kind nie aansien nie. En sy het op 'n afstand gaan sit en haar stem verhef en geween.

₁₇Toe hoor God die stem van die seun, en die Engel van God het na Hagar geroep uit die hemel en haar gevra: Wat is dit met jou, Hagar? Wees nie bevrees nie, want God het na die stem van die seun geluister op die plek waar hy is.

₁₈Staan op, tel die seun op en hou hom vas met jou hand, want Ek sal hom 'n groot nasie maak.

₁₉Daarop het God haar oë geopen, en sy sien 'n put! En sy het geloop en die sak vol water gemaak en die seun laat drink.

₂₀En God was met die seun; en hy het opgegroei en in die woestyn gewoon en 'n boogskutter geword:

₂₁hy het in die woestyn Paran gewoon; en sy moeder het vir hom 'n vrou uit Egipteland geneem.

₂₂IN dié tyd het Abiméleg en Pigol, sy leërowerste, met Abraham gespreek en gesê: God is met jou in alles wat jy doen.

₂₃Sweer dan nou vir my hier by God dat jy met my en my kroos en my nageslag nie vals sal handel nie; dieselfde guns wat ek jou bewys het, moet jy aan my bewys en aan die land waarin jy as vreemdeling vertoef.

₂₄En Abraham antwoord: Ek sweer.

₂₅Maar Abraham het Abiméleg aangespreek oor 'n put wat die dienaars van Abiméleg met geweld geneem het.

₂₆Daarop antwoord Abiméleg: Ek weet nie wie dit gedoen het nie, en jy het my dit ook nie meegedeel nie, en ek het daar ook niks van gehoor nie as net vandag.

₂₇Toe neem Abraham kleinvee en beeste en gee dit aan Abiméleg; en hulle twee het 'n verbond gesluit;

₂₈Abraham het naamlik die sewe ooilammers van die kleinvee eenkant uitgekeer.

₂₉Toe sê Abiméleg vir Abraham: Wat beteken hierdie sewe ooilammers wat jy uitgekeer het?

₃₀En hy antwoord: Die sewe ooilammers moet jy uit my hand aanneem, sodat dit vir my 'n getuienis kan wees dat ek hierdie put gegrawe het.

₃₁Daarom noem hulle dié plek Berséba, omdat hulle twee daar gesweer het.

₃₂So het hulle dan 'n verbond gesluit in Berséba. Daarna het Abiméleg en Pigol, sy leërowerste, klaargemaak en na die land van die Filistyne teruggegaan.

₃₃En hy het 'n tamarisk in Berséba geplant en daar die Naam van die Here, die ewige God, aangeroep.

₃₄En Abraham het baie dae as vreemdeling in die land van die Filistyne vertoef.