GALÁSIËRS 5

₁STAAN dan vas in die vryheid waarmee Christus ons vrygemaak het, en laat julle nie weer onder die juk van diensbaarheid bring nie.

₂Kyk, ek, Paulus, sê vir julle dat as julle jul laat besny, Christus vir julle tot geen nut sal wees nie.

₃En ek betuig dit weer aan elke mens wat hom laat besny, dat hy onder verpligting is om die hele wet te onderhou.

₄Julle wat geregverdig wil wees deur die wet, is losgemaak van Christus; julle het van die genade verval.

₅Want óns verwag deur die Gees uit die geloof die geregtigheid waarop ons hoop.

₆Want in Christus Jesus het nòg die besnydenis nòg die onbesnedenheid enige krag, maar die geloof wat deur die liefde werk.

₇Julle het goed geloop: wie het julle verhinder om die waarheid gehoorsaam te wees?

₈Hierdie oortuiging kom nie van Hom wat julle roep nie.

₉'n Bietjie suurdeeg maak die hele deeg suur.

₁₀Ek vertrou van julle in die Here dat julle nie anders sal dink nie; maar die een wat julle in die war bring, sal die oordeel dra, wie dit ook mag wees.

₁₁Maar ek, broeders, as ek nog die besnydenis verkondig, waarom word ek nog vervolg? Dan is die struikelblok van die kruis vernietig!

₁₂Ag, as die wat julle opstandig maak, hulleself tog maar ook wou vermink!

₁₃Want julle is tot vryheid geroep, broeders; gebruik net nie julle vryheid as 'n aanleiding vir die vlees nie, maar dien mekaar deur die liefde.

₁₄Want die hele wet word vervul in een woord, naamlik: Jy moet jou naaste liefhê soos jouself.

₁₅Maar as julle mekaar byt en opeet, pas op dat julle nie die een deur die ander verteer word nie.

₁₆MAAR ek sê: Wandel deur die Gees, dan sal julle nooit die begeerlikheid van die vlees volbring nie;

₁₇want die vlees begeer teen die Gees, en die Gees teen die vlees; en hulle staan teenoor mekaar, sodat julle nie kan doen wat julle wil nie.

₁₈Maar as julle deur die Gees gelei word, dan is julle nie onder die wet nie.

₁₉En die werke van die vlees is openbaar, naamlik owerspel, hoerery, onreinheid, ongebondenheid;

₂₀afgodery, towery, vyandskap, twis, jaloersheid, toornigheid, naywer, tweedrag, partyskap;

₂₁afguns, moord, dronkenskap, brassery en dergelike dinge, waarvan ek julle vooraf sê, soos ek al vroeër gesê het, dat die wat sulke dinge doen, die koninkryk van God nie sal beërwe nie.

₂₂Maar die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing.

₂₃Teen sulke dinge is die wet nie.

₂₄Maar die wat aan Christus behoort, het die vlees met sy hartstogte en begeerlikhede gekruisig.

₂₅As ons deur die Gees lewe, laat ons ook deur die Gees wandel.

₂₆Laat ons nie word soekers van ydele eer wat mekaar uittart en mekaar beny nie.