ESÉGIËL 48

₁EN dit is die name van die stamme. Aan die noordekant langs die weg van Hetlon na die ingang van Hamat en Hasar-Enan aan die grens van Damaskus, na die noorde toe langs Hamat — hy moet die ooste- en die westekant hê — Dan een deel.

₂En naas die gebied van Dan, van die oostekant af tot by die westekant: Aser een deel.

₃En naas die gebied van Aser, van die oostekant af tot by die westekant: Náftali, een.

₄En naas die gebied van Náftali, van die oostekant af tot by die westekant: Manasse, een.

₅En naas die gebied van Manasse, van die oostekant af tot by die westekant: Efraim, een.

₆En naas die gebied van Efraim, van die oostekant af tot by die westekant: Ruben, een.

₇En naas die gebied van Ruben, van die oostekant af tot by die westekant: Juda, een.

₈En naas die gebied van Juda, van die oostekant af tot by die westekant, moet die offergawe wees wat julle moet afgee: vyf-en-twintigduisend el breed en net so lank as een van die dele, van die oostekant af tot by die westekant; en die heiligdom moet in die middel daarvan wees.

₉Die offergawe wat julle aan die Here moet afgee, moet vyf-en-twintigduisend el lank wees en tienduisend breed.

₁₀En aan hulle, aan die priesters, moet die heilige offergawe toebehoort: teen die noorde 'n lengte van vyf-en-twintigduisend el en teen die weste 'n breedte van tienduisend en teen die ooste 'n breedte van tienduisend en teen die suide 'n lengte van vyf-en-twintigduisend; en die heiligdom van die Here moet in die middel daarvan wees.

₁₁Dit moet wees vir die priesters wat geheilig is, die seuns van Sadok, wat my verordening onderhou het, wat nie afgedwaal het by die afdwaling van die kinders van Israel soos die Leviete afgedwaal het nie.

₁₂So moet dit dan vir hulle 'n offergawe wees uit die offergawe van die land, iets hoogheiligs, op die grens van die Leviete.

₁₃Verder moet die Leviete, ewewydig met die grens van die priesters, ontvang 'n lengte van vyf-en-twintigduisend el en 'n breedte van tienduisend; die hele lengte moet wees vyf-en-twintigduisend en die breedte tienduisend.

₁₄En hulle mag niks daarvan verkoop of verruil nie, en die beste van die land mag nie in ander hande oorgaan nie; want dit is heilig aan die Here.

₁₅Maar die vyfduisend wat in die breedte oorgebly het, langs die vyf-en-twintigduisend — dit sal gewone land wees, bestem vir die stad as woonplek en oop veld; en die stad moet in die middel daarvan wees.

₁₆En dit is die afmetinge daarvan: die noordekant, vierduisend-vyfhonderd el; en die suidekant, vierduisend-vyfhonderd; en die oostekant, vierduisend-vyfhonderd; en die westekant, vierduisend-vyfhonderd.

₁₇En as oop veld moet by die stad behoort: Teen die noorde, tweehonderd-en-vyftig el; en teen die suide, tweehonderd-en-vyftig; en teen die ooste, tweehonderd-en-vyftig; en teen die weste, tweehonderd-en-vyftig.

₁₈En wat oorgebly het in die lengte, ewewydig met die heilige offergawe, tienduisend teen die ooste en tienduisend teen die weste — dit moet ewewydig wees met die heilige offergawe; en die opbrings daarvan sal as onderhoud dien vir die werksmense van die stad.

₁₉En wat die werksmense van die stad betref — uit al die stamme van Israel moet hulle dit bewerk.

₂₀Die hele offergawe moet wees vyf-en-twintigduisend el by vyf-en-twintigduisend — vierkantig moet julle die heilige offergawe afgee saam met die stadsbesitting.

₂₁En wat oorbly, behoort aan die vors, aan weerskante van die heilige offergawe en van die stadsbesitting, langs die vyf-en-twintigduisend, die offergawe, tot by die grens teen die ooste, en na die weste toe langs die vyf-en-twintigduisend tot by die grens teen die weste, net so lank as die stamgedeeltes — dit behoort aan die vors; en die heilige offergawe en die heiligdom van die huis moet in die middel daarvan wees.

₂₂En van die besitting van die Leviete en die besitting van die stad af, wat in die middel lê van wat die vors s'n is, tussen die grens van Juda en die grens van Benjamin, moet alles aan die vors behoort.

₂₃Verder die ander stamme. Van die oostekant af tot by die westekant: Benjamin een deel.

₂₄En naas die gebied van Benjamin, van die oostekant af tot by die westekant: Símeon, een.

₂₅En naas die gebied van Símeon, van die oostekant af tot by die westekant: Íssaskar, een.

₂₆En naas die gebied van Íssaskar, van die oostekant af tot by die westekant: Sébulon, een.

₂₇En naas die gebied van Sébulon, van die oostekant af tot by die westekant: Gad, een.

₂₈En naas die gebied van Gad, aan die suidekant na die suide toe, moet die grens wees van Tamar af na die twiswaters van Kades en na die spruit van Egipte tot by die Groot See.

₂₉Dit is die land wat julle as erfenis moet laat toekom aan die stamme van Israel, en dit is hulle gedeeltes, spreek die Here Here.

₃₀En dit is die uitgange van die stad: aan die noordekant vierduisend-vyfhonderd el lengtemaat.

₃₁En die poorte van die stad moet wees volgens die name van die stamme van Israel; drie poorte teen die noorde: die poort van Ruben, een; die poort van Juda, een; die poort van Levi, een.

₃₂En na die oostekant vierduisend-vyfhonderd el; en drie poorte, naamlik: die poort van Josef, een; die poort van Benjamin, een; die poort van Dan, een.

₃₃En die suidekant vierduisend-vyfhonderd lengtemaat; en drie poorte: die poort van Símeon, een; die poort van Íssaskar, een; die poort van Sébulon, een.

₃₄Die westekant vierduisend-vyfhonderd; hulle poorte drie: die poort van Gad, een; die poort van Aser, een; die poort van Náftali, een;

₃₅rondom agttienduisend el; en die naam van die stad sal van vandag af wees: Die Here is daar!