EFÉSIËRS 5

₁WEES dan navolgers van God soos geliefde kinders;

₂en wandel in liefde, soos Christus ons ook liefgehad het en Hom vir ons oorgegee het as 'n gawe en offer aan God tot 'n lieflike geur.

₃Maar hoerery en allerhande onreinheid of hebsug moet onder julle selfs nie genoem word nie, soos dit die heiliges betaam;

₄ook nie gemeenheid en dwase of lawwe praatjies wat nie pas nie, maar liewer danksegging.

₅Want dit moet julle weet dat geen hoereerder of onreine of gierigaard, wat 'n afgodedienaar is, 'n erfdeel het in die koninkryk van Christus en van God nie.

₆Laat niemand julle met ydel woorde verlei nie, want daardeur kom die toorn van God oor die kinders van die ongehoorsaamheid.

₇Wees dan nie hulle deelgenote nie.

₈Want vroeër was julle duisternis, maar nou is julle lig in die Here — wandel soos kinders van die lig.

₉Want die vrug van die Gees bestaan in alle goedheid en geregtigheid en waarheid.

₁₀En beproef wat die Here welbehaaglik is;

₁₁en hou nie gemeenskap met die onvrugbare werke van die duisternis nie, maar bestraf dit liewer.

₁₂Want wat in die geheim deur hulle gedoen word, is skandelik selfs om te noem.

₁₃Maar al die dinge wat deur die lig bestraf word, word openbaar; want alles wat openbaar word, is lig.

₁₄Daarom sê Hy: Ontwaak, jy wat slaap, en staan op uit die dode, en Christus sal oor jou skyn.

₁₅Pas dan op dat julle nougeset wandel, nie as onwyse nie, maar as wyse;

₁₆en koop die tyd uit, omdat die dae boos is.

₁₇Daarom moet julle nie onverstandig wees nie, maar verstaan wat die wil van die Here is.

₁₈Moenie dronk word van wyn nie — daarin is losbandigheid; maar word met die Gees vervul.

₁₉Spreek onder mekaar met psalms en lofsange en geestelike liedere; en sing en psalmsing in julle hart tot eer van die Here,

₂₀terwyl julle God die Vader altyd vir alles dank in die Naam van onse Here Jesus Christus,

₂₁en aan mekaar onderdanig is in die vrees van God.

₂₂VROUE, wees aan julle eie mans onderdanig, soos aan die Here.

₂₃Want die man is die hoof van die vrou, soos Christus ook Hoof is van die gemeente; en Hy is die Verlosser van die liggaam.

₂₄Maar soos die gemeente aan Christus onderdanig is, so moet die vroue dit ook in alles aan hul eie mans wees.

₂₅Manne, julle moet jul eie vroue liefhê, soos Christus ook die gemeente liefgehad en Homself daarvoor oorgegee het

₂₆om dit te heilig, nadat Hy dit gereinig het met die waterbad deur die woord,

₂₇sodat Hy die gemeente voor Hom kon stel, verheerlik, sonder vlek of rimpel of iets dergeliks; maar dat dit heilig en sonder gebrek sou wees.

₂₈So behoort die mans hulle eie vroue lief te hê soos hul eie liggame. Wie sy eie vrou liefhet, het homself lief;

₂₉want niemand het ooit sy eie vlees gehaat nie, maar hy voed en koester dit, net soos die Here die gemeente.

₃₀Want ons is lede van sy liggaam, van sy vlees en van sy bene.

₃₁Daarom moet die man sy vader en sy moeder verlaat en sy vrou aankleef, en hulle twee sal een vlees word.

₃₂Hierdie verborgenheid is groot, maar ek sê dit met die oog op Christus en die gemeente.

₃₃In alle geval moet elkeen van julle ook afsonderlik sy eie vrou liefhê net soos homself, en die vrou moet die man eerbiedig.