I JOHANNES 3

₁KYK wat 'n groot liefde die Vader aan ons bewys het, dat ons kinders van God genoem kan word! Om hierdie rede ken die wêreld ons nie, omdat dit Hom nie geken het nie.

₂Geliefdes, nou is ons kinders van God, en dit is nog nie geopenbaar wat ons sal wees nie; maar ons weet dat ons, as Hy verskyn, aan Hom gelyk sal wees, omdat ons Hom sal sien soos Hy is.

₃En elkeen wat hierdie hoop op Hom het, reinig homself soos Hy rein is.

₄Elkeen wat die sonde doen, doen ook die wetteloosheid, want die sonde is wetteloosheid.

₅En julle weet dat Hy verskyn het om ons sondes weg te neem, en geen sonde is in Hom nie.

₆Elkeen wat in Hom bly, sondig nie. Elkeen wat sondig, het Hom nie gesien en Hom nie geken nie.

₇My kinders, laat niemand julle mislei nie: wie die geregtigheid doen, is regverdig soos Hy regverdig is.

₈Hy wat die sonde doen, is uit die duiwel, want die duiwel sondig van die begin af. Vir hierdie doel het die Seun van God verskyn, om die werke van die duiwel te verbreek.

₉Elkeen wat uit God gebore is, doen geen sonde nie, omdat sy saad in hom bly; en hy kan nie sondig nie, want hy is uit God gebore.

₁₀Hierin is die kinders van God en die kinders van die duiwel openbaar: elkeen wat die geregtigheid nie doen nie, is nie uit God nie, en hy ook wat sy broeder nie liefhet nie.

₁₁Want dit is die boodskap wat julle van die begin af gehoor het, dat ons mekaar moet liefhê;

₁₂nie soos Kain wat uit die Bose was en sy broer doodgeslaan het nie. En waarom het hy hom doodgeslaan? Omdat sy werke boos was en dié van sy broer regverdig.

₁₃Verwonder julle nie, my broeders, as die wêreld julle haat nie.

₁₄Ons weet dat ons oorgegaan het uit die dood in die lewe, omdat ons die broeders liefhet. Hy wat sy broeder nie liefhet nie, bly in die dood.

₁₅Elkeen wat sy broeder haat, is 'n moordenaar; en julle weet dat geen moordenaar die ewige lewe as iets blywends in hom het nie.

₁₆Hieraan het ons die liefde leer ken, dat Hy sy lewe vir ons afgelê het; en ons behoort ons lewe vir die broeders af te lê.

₁₇Maar wie die goed van die wêreld het en sy broeder sien gebrek ly en sy hart vir hom toesluit, hoe bly die liefde van God in hom?

₁₈My kinders, laat ons nie liefhê met woorde of met die tong nie, maar met die daad en in waarheid.

₁₉En hieraan weet ons dat ons uit die waarheid is; en ons sal ons harte voor Hom gerusstel,

₂₀want as ons hart ons veroordeel, God is meer as ons hart, en Hy weet alles.

₂₁Geliefdes, as ons hart ons nie veroordeel nie, dan het ons vrymoedigheid teenoor God;

₂₂en wat ons ook al bid, ontvang ons van Hom, omdat ons sy gebooie bewaar en doen wat welgevallig is voor Hom.

₂₃En dit is sy gebod, dat ons in die Naam van sy Seun, Jesus Christus, moet glo en mekaar liefhê soos Hy ons 'n gebod gegee het.

₂₄En hy wat sy gebooie bewaar, bly in Hom, en Hy in hom. En hieraan weet ons dat Hy in ons bly: aan die Gees wat Hy ons gegee het.