Psalms 6

₂Here, moet my in u toorn

nie teregwys

en my in u woede nie bestraf nie.

₃Wees my genadig, Here,

want ek, ek kwyn weg;

genees my, Here,

want tot in my gebeente

is ek beangs,

₄ja, tot in my siel

is ek heeltemal vreesbevange.

Ag, Here, hoe lank nog?

₅Keer terug, Here, red my lewe;

verlos my op grond van

u troue liefde!

₆Waarlik, in die dood

kan u gevierde Naam

nie aangeroep word nie.

Wie kan U in die •doderyk prys?

₇Ek is moeg van my gesug,

elke nag deurdrenk ek my bed,

deurweek ek my slaapbank

met trane.

₈My oë is dik geswel van verdriet,

vermoeid van al my teenstanders.

₉Gee pad van my af,

julle almal wat onreg pleeg,

want die Here het gehoor

hoe hard ek huil.

₁₀Die Here het my smeking gehoor;

die Here aanvaar my gebed.

₁₁Al my vyande staan beskaamd,

hulle is heeltemal vreesbevange.

Binne 'n oogwink draai hulle

vernederd weg.