Psalms 11

By die Here skuil ek;

hoe kan julle dan vir my sê:

“Vlug soos 'n voël na die berge,

₂want kyk, die goddeloses

span 'n boog,

hulle sit hulle pyle op die boogsnaar

om in die donker

op die opregtes van hart te skiet.

₃As die fondamente afgebreek word,

wat kan 'n regverdige dan doen?”

₄Die Here is in sy •heilige paleis,

die Here –

in die hemel is sy troon.

Sy oë sien;

sy blik toets die mensekinders.

₅Die Here –

'n regverdige toets Hy,

maar in 'n goddelose en iemand

wat geweld liefhet,

het Hy 'n weersin.

₆Hy laat gloeiende kole

op goddeloses neerreën –

vuur en swael

en 'n verskroeiende wind;

dit is wat hulle toekom,

dit is hulle beker.

₇Want regverdig is die Here,

Hy het geregtigheid lief,

opregtes sal sy teenwoordigheid ervaar.