Job 34

₂“Luister na my woorde, wyses!

Kenners, hoor my aan!

₃Die oor toets immers woorde

soos die tong kos proe.

₄Wat reg is –

laat ons dit vir onsself uitmaak;

laat ons onder mekaar kennis neem

van wat goed is.

₅Want Job het gesê,

‘Ek het gelyk;

God het my my reg ontneem.

₆Sal ek lieg teen my regte in?

Ongeneeslik is my pylwond –

sonder dat ek 'n oortreding begaan het.’

₇Wie is daar nog soos Job

wat 'n gespot soos water drink,

₈hom in die geselskap bevind

van dié wat onreg pleeg

en wat saamloop met goddelose manne?

₉Hy het immers gesê,

‘Dit baat 'n man nie as hy 'n goeie

verhouding met God het nie.’

₁₀“Daarom, verstandige manne,

luister na my:

God sal nooit ooit goddeloos optree nie,

of die Almagtige ooit onreg pleeg nie.

₁₁Ja, Hy vergeld 'n mens sy dade;

volgens sy gedrag laat Hy hom dit ervaar.

₁₂Boonop staan dit vas:

God maak Hom aan niks skuldig nie;

die Almagtige verdraai nie die reg nie.

₁₃Wie het die aarde aan Hom toevertrou?

Wie het die hele wêreld daargestel?

₁₄As Hy net aan Homself sou aandag gee,

sy Gees en asem by Homself sou hou,

₁₅sal alles wat leef, saam tot niet gaan,

en die mens tot stof terugkeer.

₁₆“As daar dan by jou insig is,

luister hierna;

neem kennis van die bedoeling van my woorde!

₁₇Kan iemand wat die reg haat,

hoegenaamd regeer?

Of kan jy die Regverdige,

die Magtige, skuldig verklaar,

₁₈Hy wat vir 'n koning sê, ‘Booswig!’

vir vooraanstaandes, ‘Goddeloses!’

₁₉Hy wat nie partydig is

vir bevelvoerders nie,

wat nie aan vooraanstaande mense

voorkeur gee bo armes nie,

omdat hulle almal die werk

van sy hande is?

₂₀Binne 'n oomblik sterf hulle

in die middel van die nag.

Mense word geskud en gaan heen.

Magtiges word sonder menslike ingryping verwyder.

₂₁Want God se oë is gerig

op die mens se paaie;

al sy treë hou Hy dop.

₂₂Daar is geen donker, geen pikdonkerte,

waar hulle wat onreg pleeg,

kan wegkruip nie.

₂₃Dit berus immers nie by 'n mens

om 'n vaste tyd te bepaal

om na God te gaan met 'n regsaak nie.

₂₄God verpletter magtiges

sonder 'n ondersoek,

Hy plaas ander in hulle plek.

₂₅Daarom is Hy vertroud

met hulle dade;

Hy werp hulle oornag omver,

sodat hulle verpletter daar lê.

₂₆Daar waar die goddeloses is,

tref Hy hulle,

op 'n plek waar mense dit kan sien

₂₇– omdat hulle agter Hom wegdraai

en nie ag slaan op al sy paaie nie –

₂₈sodat die hulpgeroep

van armes Hom kan bereik,

en Hy die noodkreet

van magteloses kan hoor.

₂₉As Hy stil is,

wie kan veroordeel?

As Hy sy gesig verberg,

wie kan Hom sien?

Maar oor 'n nasie

sowel as oor die mensdom

het Hy beheer,

₃₀sodat iemand wat 'n godlose is,

nie sal regeer nie,

en daar nie vangstrikke

vir die volk sal wees nie.

₃₁As iemand vir God sou sê,

‘Ek het skuld op my gelaai,

ek sal my nie meer sleg gedra nie;

₃₂leer U my wat ek nie raaksien nie,’

of ‘as ek onreg gepleeg het,

ek sal dit nie weer doen nie,’

₃₃dink jy dan dat God hom moet vergeld,

omdat jy hom verwerp het?

Jy is immers die een wat moet kies,

nie ek nie.

Wat jy weet, sê dit!

₃₄Verstandige manne,

ja, 'n wyse man wat na my luister,

sal vir my sê,

₃₅‘Job is die een

wat sonder kennis praat;

sy woorde is sonder insig.

₃₆Mag Job tot die uiterste getoets word,

omdat hy antwoord soos misdadigers;

₃₇want hy voeg oortreding by sy sonde;

onder ons saai hy twyfel.

Hy stapel sy woorde teen God op.’ ”