Jeremia 13

₁So het die Here vir my gesê: “Gaan koop vir jou 'n lendedoek van linne en bind dit om jou heupe. Moet dit nie in water laat kom nie.” ₂Ek het toe die lendedoek gekoop, volgens die opdrag van die Here, en dit om my heupe gebind.

₃Die woord van die Here het 'n tweede keer tot my gekom: ₄“Neem die lendedoek wat jy gekoop het, wat om jou heupe is. Maak gereed en gaan na die Perat, en steek dit daar in 'n rotsskeur weg.” ₅Ek het gegaan en dit by die Perat weggesteek soos die Here my beveel het.

₆Ná verloop van baie dae het die Here vir my gesê: “Maak gereed, gaan na die Perat en gaan haal die lendedoek wat Ek jou beveel het om daar weg te steek.” ₇Ek het toe na die Perat gegaan, gegrawe en die lendedoek uit die plek gehaal waar ek dit weggesteek het. En kyk, die lendedoek het tot niet gegaan; dit het vir niks meer gedeug nie.

₈Toe het die woord van die Here tot my gekom: ₉“So sê die Here, ‘Net so sal Ek die hoogmoed van Juda en die buitengewone hoogmoed van Jerusalem tot niet maak. ₁₀Hierdie slegte volk, wat weier om na my woorde te luister, wat volhard in die verstoktheid van hulle harte, en agter ander gode aanloop om hulle te dien en voor hulle in aanbidding te buig, sal word soos hierdie lendedoek wat vir niks meer deug nie. ₁₁Ja, soos die lendedoek om die heupe van 'n man vassit, so het Ek die hele huis van Israel en die hele huis van Juda aan My laat vassit,’ is die uitspraak van die Here, ‘om vir My 'n volk te wees, 'n roem, 'n lof en 'n sieraad. Maar hulle het nie geluister nie.’

₁₂“Sê dan vir hulle hierdie woorde, ‘So sê die Here, die God van Israel: “Elke kruik moet met wyn gevul word.” ’ Hulle sal vir jou sê, ‘Weet ons dan nie baie goed dat elke kruik met wyn gevul moet word nie?’ ₁₃Dan moet jy hulle antwoord, ‘So sê die Here: “Kyk, Ek gaan al die inwoners van hierdie land, en die konings wat as nageslag van Dawid op sy troon sal sit, en die priesters en die profete, en al die inwoners van Jerusalem vul met dronkenskap. ₁₄Ek sal hulle stukkend stamp, die een teen die ander, vaders en kinders saam,” ’ ” is die uitspraak van die Here. “ ‘ “Ek sal geen deernis hê nie, hulle nie jammer kry of My oor hulle ontferm deur hulle nie te vernietig nie.” ’ ”