Jakobus 5

₁Kom nou, julle rykes, huil en weeklaag oor die rampe wat julle gaan tref! ₂Julle rykdom het vergaan, en julle klere is motgevreet. ₃Julle goud en silwer is verroes, en die roes sal teen julle getuig, en julle liggame soos vuur verteer. Julle het in die laaste dae skatte opgegaar. ₄Kyk, die loon wat julle weerhou het van die arbeiders wat julle lande geoes het, roep dit uit, en die geroep van diegene wat oes, het die ore van die Here, Heerser oor alle magte, bereik. ₅Julle het op aarde weelderig en losbandig gelewe. Julle het julle harte vet gevoer vir die slagdag. ₆Julle het die •regverdige veroordeel en vermoor; hy kan hom nie teen julle verweer nie.

₇Wees geduldig, broers, tot met die wederkoms van die Here. Kyk, die landbouer wag met geduld op die waardevolle opbrengs van die aarde, tot die vroeë en laatreëns geval het. ₈Wees dan geduldig, staal julle harte, want die wederkoms van die Here is naby. ₉Moenie oor mekaar kla nie, broers, sodat julle nie geoordeel word nie. Kyk, die Regter staan voor die deur.

₁₀Neem as voorbeeld van lyding en geduld, broers, die profete wat in die Naam van die Here gepraat het. ₁₁Kyk, ons beskou hulle wat volhard, as gelukkig. Julle het gehoor van Job se volharding, en julle het die Here se einddoel met hom gesien, en dat die Here vol medelye en ontferming is.

₁₂Bo alles, my broers, moenie sweer nie – nie by die hemel nie, en nie by die aarde nie – en moet ook geen ander eed aflê nie. Maar laat julle “ja” 'n “ja” wees, en julle “nee” 'n “nee”, sodat die oordeel julle nie tref nie.

₁₃As iemand van julle swaarkry, moet hy bid. As iemand opgeruimd is, moet hy psalms sing. ₁₄As iemand van julle siek is, moet hy die ouderlinge van die •gemeente roep, sodat hulle vir hom kan bid, nadat hulle hom in die Naam van die Here met olyfolie gesalf het. ₁₅Die gelowige gebed sal die sieke gesond laat word, en die Here sal hom weer oprig. En as hy sonde gedoen het, sal hy vergewe word. ₁₆Bely dan julle sondes teenoor mekaar, en bid vir mekaar, sodat julle gesond kan word. Die gebed van 'n •regverdige is baie kragtig in sy uitwerking. ₁₇Elia was 'n mens net soos ons, en hy het vurig gebid dat dit nie moet reën nie, en dit het drie jaar en ses maande lank nie op die aarde gereën nie. ₁₈Toe het hy weer gebid, en die hemel het reën gegee, en die aarde het sy vrug opgelewer.

₁₉My broers, as enigeen van julle afdwaal van die waarheid, en iemand hom laat terugdraai, ₂₀moet hy weet dat wie 'n sondaar van sy dwaalweg laat terugdraai, sy siel uit die dood sal red en 'n menigte sondes sal bedek.