Jakobus 3

₁Moenie almal leermeesters wil wees nie, my broers, omdat julle weet dat ons strenger geoordeel sal word. ₂Almal van ons struikel tog dikwels. As iemand nie met woorde struikel nie, is hy 'n volmaakte man, en ook daartoe in staat om sy hele liggaam in toom te hou. ₃Ons sit stange in perde se bekke, sodat hulle ons gehoorsaam, en daarmee stuur ons hulle hele liggaam. ₄Kyk, selfs skepe, hoewel hulle so groot is en deur hewige winde aangedryf word, word met 'n baie klein roer gestuur na waar die stuurman wil. ₅So is die tong ook 'n klein ledemaat wat op groot dinge roem. Kyk watter klein vuurtjie steek 'n groot hoop hout aan die brand! ₆Die tong is ook 'n vuur, 'n wêreld van ongeregtigheid. Die tong is deel van ons ledemate, maar besoedel die hele liggaam. Dit steek die hele lewensloop aan die brand, en word uit Gehenna aangesteek. ₇Want elke soort wilde dier en voël, en kruipende dier en seedier, word en is getem deur die mensdom. ₈Maar geen mens kan die tong tem nie; dit is 'n onbestendige kwaad, vol dodelike gif. ₉Daarmee loof ons die Here en Vader, en daarmee vervloek ons mense wat na die beeld van God geskep is. ₁₀Uit dieselfde mond kom seën en vervloeking. Dit, my broers, behoort nie so te wees nie. ₁₁'n Fontein laat tog nie uit dieselfde oog vars én bitter water uitborrel nie? ₁₂'n Vyeboom, my broers, kan tog nie olywe dra, of 'n druiwestok vye nie? 'n Brak fontein kan ook nie soet water gee nie.

₁₃Wie onder julle is wys en verstandig? Laat hy deur goeie gedrag sy dade met sagmoedige wysheid toon. ₁₄Maar as daar bittere afguns en selfsug in julle harte is, moet julle dan nie op wysheid beroem, en teen die waarheid lieg nie. ₁₅Dít is nie die wysheid wat van bo kom nie, maar aards, nie-geestelik en demonies. ₁₆Want waar afguns en selfsug heers, kom wanorde en allerlei gemene dade voor. ₁₇Maar die wysheid van bo is in die eerste plek suiwer, en verder ook vredeliewend, bedagsaam, inskiklik, vol deernis en goeie vrugte, onpartydig en ongeveins. ₁₈En die vrug van •geregtigheid word in vrede gesaai vir hulle wat vrede maak.