Psalms 75

₂Ons prys U, o God, ons prys U;

u Naam is naby.

Mense vertel van u wonderwerke.

₃God sê:

“Wanneer die tyd aanbreek

wat Ek bepaal het,

sal Ek self met billikheid oordeel.

₄Die aarde en al sy bewoners

kan wankel –

Ek self het sy pilare gevestig.” •Sela

₅Vir verwaande mense sê ek:

“Moenie verwaand wees nie.”

Vir die goddeloses:

“Moenie horings oplig nie.

₆Moenie julle horings

teen die hemel lig nie;

moenie verwaand,

met 'n stywe nek, praat nie.

₇Want verheffing kom nie

van waar die son opkom

of van waar dit ondergaan nie,

en ook nie van die woestyn af nie.

₈Nee, God is regter:

Die een verneder Hy,

die ander verhef Hy.”

₉Ja, daar is 'n beker in die hand

van die Here met wyn

wat gegis het en vol kruie is.

Hy skink daaruit.

Al die goddeloses van die aarde

sal dit moet drink,

dit tot die droesem moet ledig.

₁₀En ek, ek sal dit altyd verkondig,

ek sal die God van Jakob besing, wat sê:

₁₁“Al die horings van goddeloses

sal Ek afbreek,

maar die horings van regverdiges

sal opgelig word.”