Psalms 149

₁Halleluja!

Sing vir die Here 'n nuwe lied –

sy lof in die byeenkoms

van getroue volgelinge!

₂Laat Israel hom verheug in sy Maker,

laat die kinders van Sion juig

oor hulle Koning.

₃Laat hulle sy Naam loof met koordans,

met begeleiding van tamboeryne

en liere Hom besing.

₄Want die Here is sy volk goedgesind;

Hy vereer verdruktes met oorwinning.

₅Laat getroue volgelinge juig

in eerbetoon;

laat hulle jubel op hulle beddens –

₆met verheerliking van God

uit hulle kele,

en tweesnydende swaarde

in hulle hande,

₇om vergelding te voltrek

onder die nasies,

straf onder die volke,

₈om hulle konings

in kettings te slaan

en hulle geëerdes in ysterboeie,

₉om die vonnis wat opgeteken is,

oor hulle te voltrek.

Dit sal luister verleen

aan al sy getroue volgelinge.

Halleluja!