Matteus 23

₁Toe het Jesus vir die skare en vir sy dissipels gesê: ₂“Die skrifkenners en •Fariseërs sit op die stoel van Moses. ₃Doen en onderhou dan alles wat hulle vir julle sê. Maar moenie doen wat hulle doen nie, want hulle praat net en doen nie. ₄Hulle bind swaar vragte saam, ja, moeilik om te dra, en lê dit op die mense se skouers, maar self is hulle nie bereid om met 'n vinger aan die vrag te raak nie. ₅Al hulle dade is bedoel om deur die mense gesien te word. Hulle maak immers hulle gebedsrieme breër en die tossels langer. ₆Hulle hou van die ereplek by feesmaaltye en die voorste sitplekke in die •sinagoges, ₇om op die markpleine begroet en om deur die mense as ‘rabbi’ aangespreek te word. ₈Maar julle, julle moet julle nie as ‘rabbi’ laat aanspreek nie; want net Een is julle Leermeester, en julle is almal broers. ₉En moet niemand op aarde as julle ‘vader’ aanspreek nie; want julle het net een Vader, Hy wat in die hemel is. ₁₀Julle moet julle ook nie as leraars laat aanspreek nie, omdat net Een julle Leraar is, naamlik die •Christus. ₁₁Die belangrikste onder julle moet julle dienaar wees. ₁₂Wie homself verhef, sal verneder word, en wie homself verneder, sal verhef word.”

₁₃“Wee julle, skrifkenners en •Fariseërs, skynheiliges! Want julle sluit die mense uit die •koninkryk van die hemele uit. Self gaan julle nie in nie, en boonop laat julle die mense wat probeer ingaan, nie toe om in te gaan nie.

₁₅“Wee julle, skrifkenners en Fariseërs, skynheiliges! Want julle deurkruis land en see om 'n enkele proseliet te werf, en wanneer dit gebeur, maak julle hom 'n kind van Gehenna, dubbel so erg as julleself.

₁₆“Wee julle, blinde leiers! Julle sê, ‘Wie by die heiligdom van die •tempel sweer – dit beteken niks nie; maar wie sweer by die goud van die heiligdom, is gebonde.’ ₁₇Dwase en blindes! Wat is belangriker, die goud of die heiligdom wat die goud heilig? ₁₈Verder sê julle, ‘Wie by die altaar sweer – dit beteken niks nie; maar wie sweer by die offergawe daarop, is gebonde.’ ₁₉Blindes! Wat is belangriker, die offergawe of die altaar wat die offergawe heilig? ₂₀Wie dan sweer by die altaar, sweer daarby en by alles daarop. ₂₁Wie sweer by die heiligdom, sweer daarby en by Hom wat dit bewoon. ₂₂En wie by die hemel sweer, sweer by die troon van God en by Hom wat daarop sit.

₂₃“Wee julle, skrifkenners en Fariseërs, skynheiliges! Want julle gee tiendes van kruisement en vinkel en komyn, maar julle het die gewigtigste van die wet nagelaat – die reg en die barmhartigheid en die trou. Hierdie dinge moes julle gedoen het sonder om die ander na te laat. ₂₄Blinde leiers! Julle sif die muggie uit, maar sluk die kameel in.

₂₅“Wee julle, skrifkenners en Fariseërs, skynheiliges! Want julle maak die buitekant van die beker en die skottel skoon, maar binnekant is dit vol roofsug en onbeheersdheid. ₂₆Blinde Fariseër! Maak eers die binnekant van die beker skoon, dan sal ook die buitekant skoon wees.

₂₇“Wee julle, skrifkenners en Fariseërs, skynheiliges! Want julle is soos witgekalkte grafte wat van buite pragtig lyk, maar van binne is julle vol doodsbeendere en elke vorm van •onreinheid. ₂₈So lyk julle inderdaad ook van buite vir die mense regverdig, maar van binne is julle vol skynheiligheid en wetteloosheid.

₂₉“Wee julle, skrifkenners en Fariseërs, skynheiliges! Want julle bou die grafte vir die profete en versier die grafmonumente van die •regverdiges. ₃₀En julle sê, ‘As ons in die dae van ons vaders geleef het, sou ons nie saam met hulle deel gehad het aan die bloed van die profete nie.’ ₃₁Daarmee getuig julle teen julleself dat julle kinders is van hulle wat die profete vermoor het. ₃₂Maak julle dan maar die maat van julle vaders vol. ₃₃Slange, addergeslag! Hoe sal julle die oordeel van die Gehenna ontvlug? ₃₄Daarom, kyk, Ek stuur vir julle profete en wyses en skrifkenners. Julle sal sommige van hulle doodmaak en kruisig, en julle sal sommige van hulle in julle •sinagoges gesel en hulle van dorp tot dorp vervolg. ₃₅So sal alle regverdige bloed wat op aarde vergiet is, vir julle toegereken word, van die bloed van Abel, die regverdige, tot by die bloed van Sagaria, die seun van Beregja, wat julle tussen die heiligdom en die altaar vermoor het. ₃₆•Amen, Ek sê vir julle: Al hierdie dinge sal op hierdie geslag neerkom.”

₃₇“Jerusalem, Jerusalem, jy wat die profete doodmaak en dié stenig wat na jou gestuur is! Hoe dikwels wou Ek jou kinders bymekaarmaak soos 'n hen haar kuikens onder haar vlerke bymekaarmaak, maar julle wou nie. ₃₈Kyk, julle huis word vir julle verwoes agtergelaat. ₃₉Want Ek sê vir julle, van nou af sal julle My beslis nie weer sien nie, totdat julle sal sê,