Matteus 22

₁Jesus het weer met hulle deur gelykenisse gepraat en gesê: ₂“Die •koninkryk van die hemele is soos 'n koning wat 'n •bruilofsfees vir sy seun voorberei het. ₃Hy het toe sy slawe gestuur om dié wat na die bruilofsfees genooi is, te roep, maar hulle wou nie kom nie. ₄Nog 'n keer het hy ander slawe gestuur, met die opdrag, ‘Sê vir die genooides: Kyk, ek het my feesmaal gereedgemaak. My beeste en die vetgemaakte vee is geslag, en alles is gereed – kom na die bruilofsfees!’ ₅Maar hulle het hulle nie daaraan gesteur nie en weggegaan, die een na sy stuk grond, die ander na sy besigheid. ₆Die res van hulle het sy slawe gegryp, hulle sleg behandel en doodgemaak. ₇Die koning het kwaad geword; hy het sy soldate gestuur, daardie moordenaars om die lewe gebring en hulle stad afgebrand. ₈Toe sê hy vir sy slawe, ‘Die bruilofsfees is gereed, maar die genooides was dit nie waardig nie. ₉Gaan dan uit na die kruispaaie en nooi soveel mense na die bruilofsfees as wat julle kan vind.’ ₁₀Toe het daardie slawe uitgegaan na die paaie en almal bymekaargemaak wat hulle teëgekom het, slegtes sowel as goeies. En die bruilofsaal het vol gaste geword. ₁₁Toe die koning ingaan om die gaste te sien, sien hy daar 'n man sonder 'n bruilofskleed aan. ₁₂En hy vra hom, ‘Vriend, hoe het jy hier ingekom sonder 'n bruilofskleed?’ Maar die man het geswyg. ₁₃Toe sê die koning vir die dienaars, ‘Bind sy voete en hande vas en gooi hom uit in die duisternis daarbuite.’ Daar sal 'n geween en 'n gekners van tande wees. ₁₄Baie is immers geroep, maar min is uitgekies.”

₁₅Toe het die •Fariseërs gegaan en 'n plan beraam om Hom in 'n strik te laat beland oor wat Hy sê. ₁₆Hulle stuur toe hulle dissipels saam met die Herodiane na Hom en sê: “Meester, ons weet dat u opreg is en God se weg waarheidsgetrou leer en u aan niemand steur nie, want u neem nie die aansien van persone in aanmerking nie. ₁₇Sê dan vir ons wat is u opinie: Is dit toelaatbaar om aan die keiser belasting te betaal of nie?” ₁₈Omdat Jesus egter hulle bose bedoeling geken het, het Hy gesê: “Waarom toets julle My, julle skynheiliges? ₁₉Wys vir My die munt waarmee julle belasting betaal.” Hulle het vir Hom 'n denarius gebring. ₂₀Hy vra hulle toe: “Wie se afbeelding en inskripsie is dit dié?” ₂₁En hulle sê vir Hom: “Die keiser s'n.” Daarop sê Hy vir hulle: “Gee dan aan die keiser wat hom toekom en aan God wat Hom toekom.” ₂₂Toe hulle dit hoor, was hulle verbaas. Hulle het Hom daar agtergelaat en weggegaan.

₂₃Daardie selfde dag kom die •Sadduseërs, hulle wat sê dat daar nie 'n opstanding is nie, na Hom en vra: ₂₄“Meester, Moses het gesê, ‘As iemand sonder kinders sterf, moet sy broer met die vrou trou en 'n nageslag vir sy broer verwek.’ ₂₅By ons was daar sewe broers. Die eerste het getrou en gesterf, en sy vrou vir sy broer agtergelaat, omdat hy nie self 'n nageslag gehad het nie. ₂₆Dieselfde het gebeur met die tweede en die derde broer tot by die sewende een. ₂₇Laaste van almal het die vrou gesterf. ₂₈By die opstanding, wie van die sewe se vrou sal sy dan wees? Almal het haar immers as vrou gehad.” ₂₉Jesus het hulle egter geantwoord: “Julle dwaal, omdat julle die Skrifte nie ken nie, en ook nie die krag van God nie. ₃₀By die opstanding tree hulle nie in die huwelik nie en word hulle ook nie in die huwelik uitgegee nie, maar hulle is soos engele in die hemel. ₃₁En wat die opstanding van die dooies betref, het julle nie gelees wat God aan julle gesê het nie, ₃₂‘Ek is die God van Abraham en die God van Isak en die God van Jakob.’? Hy is nie die God van dooies nie, maar van lewendes.” ₃₃Toe die skare dit hoor, was hulle verstom oor sy lering.

₃₄Toe die •Fariseërs hoor dat Hy die •Sadduseërs die swye opgelê het, het hulle bymekaargekom. ₃₅Een van hulle, 'n wetskenner, het vervolgens 'n vraag gestel om Hom te toets: ₃₆“Meester, wat is die belangrikste gebod in die Wet?” ₃₇Hy het vir hom gesê: “ ‘Jy moet die Here jou God liefhê met jou hele hart en met jou hele siel en met jou hele verstand.’ ₃₈Dit is die belangrikste en die eerste gebod. ₃₉En die tweede wat hieraan gelyk staan, is, ‘Jy moet jou naaste liefhê soos jouself.’ ₄₀Op hierdie twee gebooie berus die hele Wet en die Profete.”

₄₁Toe die •Fariseërs bymekaar was, het Jesus hulle gevra: ₄₂“Wat sê julle van die Christus? Wie se Seun is Hy?” Hulle antwoord Hom: “Dawid s'n.” ₄₃Hy vra hulle toe: “Hoe kan Dawid Hom dan, deur die werking van die Gees, ‘Here’ noem, as hy sê,