Job 35

₂“Dink jy dit is reg as jy sê,

‘Ek, eerder as God, het gelyk!’?

₃Ja, jy sê,

‘Watter nut het dit vir U?

Wat baat dit my as ek nie sondig nie?’

₄Ek sal jou daarop antwoord,

jou en jou vriende.

₅Kyk na die hemel en sien!

Aanskou die wolkehemel!

Dit is hoër as jy.

₆As jy sondig,

wat doen dit aan Hom?

As jou oortredinge baie is,

wat veroorsaak jy vir Hom?

₇As jy regverdig is,

wat gee jy vir Hom,

of wat ontvang Hy uit jou hand?

₈Jou oortreding raak

net 'n mens soos jy,

jou regverdigheid net 'n mensekind.

₉“Omdat daar soveel verdrukking is,

roep mense om hulp;

aanhoudend roep hulle

oor die krag van magtiges,

₁₀maar wat hulle nie sê nie, is,

‘Waar is God, my Maker,

Hy wat lofsange gee in die nag,

₁₁Hy wat ons onderrig,

meer as die diere van die aarde,

en ons slim maak,

meer as die voëls van die hemel?’

₁₂Dan roep hulle om hulp

oor die hoogmoed van slegte mense,

maar Hy antwoord nie.

₁₃Na 'n leë geroep

luister God egter nie;

die Almagtige slaan nie daarop

ag nie.

₁₄Hoeveel minder nog wanneer jy sê

dat jy Hom nie sien nie,

dat die regsaak voor Hom is,

maar dat jy steeds op Hom wag?

₁₅Maar nou, omdat sy toorn

nie verantwoording eis nie,

en Hy nie veel ag slaan

op oortreding nie,

₁₆het Job sy mond vol onsin,

vermeerder hy woorde sonder kennis.”