Hosea 14

₁Samaria gaan boet,

want sy was in opstand teen haar God.

Deur die swaard sal hulle val;

hulle kinders sal verpletter word,

hulle swanger vroue sal oopgesny word.

₂Keer terug, Israel,

na die Here jou God,

want jy het deur jou sondeskuld gestruikel.

₃Kom met julle woorde

en keer terug na die Here.

Sê vir Hom:

“Vergewe ons sondeskuld volkome,

aanvaar ons belydenis;

ons wil met die vrug van ons lippe vergoed.

₄Assirië kan ons nie red nie,

op perde wil ons nie ry nie,

en ons sal nie meer ons handewerk

‘ons god’ noem nie;

want net by U vind die vaderlose

ontferming.”

₅“Ek sal hulle afvalligheid genees,

Ek sal hulle uit vrye wil liefhê.

Omdat my woede teen hom bedaar het,

₆sal Ek vir Israel wees soos dou.

Hy sal bloei soos 'n narsing,

en wortels skiet soos die Libanon.

₇Sy lote sal uitsprei;

sy prag sal wees soos dié

van 'n olyfboom,

en sy geur soos dié

van die Libanon.

₈Dié wat in sy skaduwee

gewoon het, sal terugkeer;

hulle sal koring verbou,

en uitspruit soos 'n wingerdstok.

Die roem van Israel sal wees

soos die wyn van die Libanon.

₉“Efraim, watter ooreenkoms

is daar nog tussen My en die afgode?

Ek is die Een wat hom antwoord,

en Ek hou hom in die oog.

Ek is soos 'n immergroen sipres –

by My word jou vrugbaarheid gevind.”

₁₀Wie is wys dat hy hierdie dinge

kan verstaan,

en verstandig dat hy dit kan begryp?

Ja, die paaie van die Here is reguit –

regverdiges loop daarop,

maar oortreders sal daarop struikel.