Hosea 12

₁“Efraim het My omring met leuens,

en die huis van Israel met bedrog.

Juda is steeds bandeloos teenoor God,

maar teenoor die heiliges is hy getrou.

₂Efraim pas die wind op,

hy loop heeldag agter die oostewind aan.

Al wat hy vermeerder,

is leuens en verwoesting.

Met Assirië sluit hulle 'n verdrag,

maar olie word na Egipte gestuur.”

₃Die Here het 'n regsaak teen Juda,

en Hy gaan Jakob tot verantwoording roep

oor sy optrede;

Hy gaan hom vergeld volgens sy dade.

₄In die moederskoot het hy al sy broer

aan die hakskeen vasgehou,

en in sy manlike krag

het hy met God geworstel.

₅Hy het met die Engel geworstel

en het oorwin;

want hy het gehuil en Hom

om genade gesmeek:

“By Bet-El sal Hy hom ontmoet,

daar sal Hy met ons praat.

₆Die Here, die God van alle magte,

Here is sy gedenknaam.”

₇Maar jy, na jou God moet jy terugkeer.

Lê jou toe op troue liefde en wat reg is,

en wag altyddeur op jou God.

₈“Kanaän – in sy hand

is daar 'n vals weegskaal;

hy hou daarvan om uit te buit.

₉Efraim sê, ‘Ja, ek het ryk geword;

ek het self welvarend geword.

Alles wat ek met moeite verkry het –

niks kan gevind word wat as sondeskuld

teen my gehou word,

wat as 'n oortreding geld nie.’

₁₀Maar Ek is die Here jou God

– al van Egipteland af.

Ek sal jou weer in tente laat woon

soos in die feestyd.

₁₁Ek het met die profete gepraat;

Ek het dit deur baie visioene gedoen,

en deur profete tref Ek vergelykings.

₁₂Is Gilead boos?

Hulle het heeltemal tot niet gegaan.

In Gilgal het Efraim selfs bulle geoffer;

ook hulle altare sal kliphope word

in die slote in die veld.

₁₃Jakob het gevlug

na die veld van Aram;

Israel moes dienswerk doen

om 'n vrou te verkry;

ja, om 'n vrou te verkry,

moes hy kleinvee oppas.

₁₄Deur 'n profeet het die Here

Israel uit Egipte laat optrek;

ja, deur 'n profeet is hulle opgepas.”

₁₅Efraim het uiters beledigend opgetree.

Sy Heer hou hom verantwoordelik

vir sy bloedskuld;

Hy sal hom vergeld vir sy uittarting.