Esegiël 35

₁Die woord van die Here het tot my gekom: ₂“Mensekind, draai jou gesig na die berg Seïr en profeteer teen hom; ₃sê vir hom, ‘So sê my Heer, die Here: “Dit is Ek teen jou, berg Seïr! Ek sal my hand teen jou uitstrek en jou 'n woesteny, 'n afgryslike plek maak. ₄Jou dorpe sal Ek puinhope maak; en jy, jy sal verlate wees. Dan sal jy besef dat Ek die Here is. ₅Omdat jy 'n ewigdurende vyandskap koester, en jy die Israeliete oorgelewer het aan die snykante van die swaard in die tyd van hulle teenspoed, in die tyd van finale straf, ₆daarom, so seker as wat Ek leef,” is die uitspraak van my Heer, die Here, “aan bloedskuld sal Ek jou beslis onderwerp, en bloedskuld sal jou agtervolg. Jy het nie 'n weersin gehad in bloedskuld nie, en bloedskuld sal jou agtervolg.”

₇“ ‘ “Ek sal die berg Seïr 'n woesteny, 'n afgryslike plek maak; Ek sal hulle wat daar verbytrek en terugkeer, uitroei. ₈Ek sal sy berge vol van sy gesneuweldes maak. Op jou heuwels, in jou valleie, in al jou stroombeddings – daar sal dié wat gesneuwel het deur die swaard, val. ₉'n Ewige woesteny maak Ek jou; jou dorpe sal nie bewoon word nie, en julle sal besef dat Ek die Here is. ₁₀Omdat jy gesê het, ‘Die twee nasies en die twee lande behoort aan my, en ons gaan dit in besit neem,’ – alhoewel die Here daar was – ₁₁daarom, so seker as wat Ek leef,” is die uitspraak van my Heer, die Here, “Ek sal optree in ooreenstemming met jou toorn en afguns waarmee jy uit haat teen hulle opgetree het. Ek sal Myself aan hulle bekend maak wanneer Ek jou oordeel. ₁₂Jy sal besef dat Ek die Here is. Ek het al jou beledigings gehoor wat jy uitgespreek het teen die berge van Israel, deur te sê, ‘Hulle lê verlate – aan ons is hulle as voedsel gegee.’

₁₃“ ‘ “Julle het julle groot gehou teen My met al julle gepraat; julle het julle woorde teen My net te veel gemaak. Ek self het dit gehoor.” ₁₄So sê my Heer, die Here: “Terwyl die hele aarde verheug is, maak Ek van jou 'n woesteny. ₁₅Soos wat jy vreugde ervaar oor die erfgrond van die huis van Israel omdat dit verlate lê, só sal Ek met jou maak: Jy sal verlate lê, berg van Seïr, ja, die hele Edom. Dan sal hulle besef dat Ek die Here is.” ’ ”