Eksodus 35

₁Moses het die hele volksvergadering van die Israeliete byeen laat kom en vir hulle gesê: “Dit is die sake wat die Here julle beveel het om te doen. ₂Ses dae lank kan werk gedoen word, maar die sewende dag moet vir julle heilig wees, 'n buitengewone Sabbat, tot eer van die Here. Elkeen wat werk doen op dié dag, moet doodgemaak word. ₃Julle mag nie op die Sabbatdag 'n vuur aansteek in enige van julle woonplekke nie.”

₄Moses het vir die hele volksvergadering van die Israeliete gesê: “Dit is die opdrag wat die Here gegee het, ₅‘Neem van wat julle het 'n •wydingsgeskenk vir die Here. Elkeen wie se hart gewillig is, moet dit bring – 'n wydingsgeskenk vir die Here: goud, silwer en brons; ₆pers, purperrooi en karmosynrooi wol, fyn linnedraad en bokhaar; ₇rooi gekleurde ramsvelle, sagte leer en doringhout; ₈olie vir die kandelaar, speserye vir die salfolie en vir die geurige reukwerk; ₉•oniksstene en edelstene as monterings vir die efod en die borstas. ₁₀Laat elkeen onder julle wat vaardig is, kom en alles maak wat die Here beveel het: ₁₁die •tabernakel, die tent, die bedekking, die hakies, die planke, die dwarshoute, die staanders en die voetstukke daarvan; ₁₂die ark en sy draaghoute, die versoendeksel, die voorhangsel wat dien as gordyn; ₁₃die tafel met sy draaghoute en al sy toebehore, en die vertoonbrode; ₁₄die menora vir lig, met sy toebehore en sy lampe, en die olie vir die lig; ₁₅die altaar vir die reukwerk, en sy draaghoute, die salfolie en die geurige reukwerk, en die toegangsgordyn by die ingang van die tabernakel; ₁₆die brandofferaltaar met sy traliewerk van brons, die draaghoute en al sy toebehore, die waskom en sy voetstuk; ₁₇die behangsels vir die binneplein, die staanders en die voetstukke, en die gordyn vir die ingang van die binneplein; ₁₈die tentpenne van die tabernakel en die tentpenne van die binneplein met hulle toue; ₁₉die geweefde klere om in die heiligdom dienswerk te doen, dit is die heilige klere vir Aäron, die priester, en die klere vir sy seuns vir die priesterdiens.’ ”

₂₀Die hele volksvergadering van die Israeliete het van Moses af weggegaan. ₂₁Elkeen wie se hart hom daartoe gebring het, en elkeen wie se gees hom daartoe aangespoor het, het gekom, en hulle het vir die Here 'n wydingsgeskenk gebring vir die werk aan die Tent van Ontmoeting en vir al die dienswerk daaraan verbonde, en vir die heilige klere. ₂₂Hulle het gekom, die mans sowel as die vroue, almal wie se harte daartoe bereid was. Hulle het borsspelde, oorbelle, ringe en halskettings, allerlei goue voorwerpe, gebring – elkeen wat 'n gewyde gawe van goud vir die Here wou aanbied. ₂₃Elkeen wat in besit was van pers, purperrooi en karmosynrooi wol, fyn linnedraad en bokhaar, rooi gekleurde ramsvelle en sagte leer, het dit gebring. ₂₄Elkeen wat 'n wydingsgeskenk van silwer en brons wou aanbied, het 'n wydingsgeskenk vir die Here gebring; en elkeen wat in besit was van doringhout wat vir enige werk gebruik kon word, het dit gebring. ₂₅Elke vrou wat vaardig was, het met haar twee hande spinwerk gedoen en het pers, purperrooi en karmosynrooi wol en fyn linnedraad gebring. ₂₆Al die vroue wie se harte hulle daartoe beweeg het en wat oor die nodige vaardigheid beskik het, het die bokhaar gespin. ₂₇Die leiers het oniksstene en ander edelstene vir die monterings op die efod en die borstas gebring, ₂₈en speserye en olie vir die lig, die salfolie en die geurige reukwerk. ₂₉So het die Israeliete dit as 'n vrywillige offer vir die Here gebring, elke man en vrou wie se harte hulle daartoe aangespoor het om iets te bring vir al die werk wat die Here by monde van Moses beveel het.

₃₀Moses het vir die Israeliete gesê: “Kyk, die Here het Besaleël, seun van Uri, seun van Gur, van die stam van Juda, by die naam aangewys. ₃₁Hy het hom met die Gees van God vervul – met wysheid, met insig en met kennis en al die nodige vakmanskap – ₃₂om vindingryke planne te beraam vir die werk met goud, silwer en brons; ₃₃en vir die bewerking van edelstene vir monterings, en die bewerking van hout – om dit vindingryk te doen met al die nodige vakmanskap. ₃₄En die Here het dit ook in sy hart gegee om te onderrig. Hy en Oholiab, seun van Agisamag, van die stam van Dan – ₃₅die Here het hulle vervul met die kundigheid om al die werk van 'n vakman te doen: dié van 'n ontwerper, 'n borduurder met pers, purperrooi en karmosynrooi wol en fyn linnedraad, en dié van 'n wewer – mense wat al die werk kan doen en vindingryke planne kan beraam.