Kolossense 4

₂Volhard in gebed. Wees waaksaam en dankbaar as julle bid. ₃Bid terselfdertyd ook vir ons, dat God vir ons 'n deur vir die Woord sal oopsluit, om die misterie van •Christus te verkondig – dit waarvoor ek in boeie is – ₄en bid dat ek dit met die regte woorde sal kan verduidelik. ₅Tree met wysheid teenoor buitestanders op, en koop die tyd uit. ₆Julle woorde moet altyd van goeie smaak getuig, met •sout besprinkel, sodat julle kan weet hoe om 'n ieder en 'n elk te antwoord.

₇Tigikus, die geliefde broer, getroue dienaar en medewerker in die Here, sal alles oor my omstandighede aan julle bekend maak. ₈Juis hiervoor stuur ek hom na julle, sodat julle van ons omstandighede kan weet, en sodat hy julle harte kan bemoedig. ₉Ek stuur hom saam met Onesimus, die getroue en geliefde broer, wat van julle af kom. Hulle sal julle alles van ons omstandighede hier vertel.

₁₀Aristargus, my medegevangene, stuur groete vir julle, en ook Markus, Barnabas se neef. Oor hom het julle reeds opdragte ontvang – wanneer hy by julle kom, verwelkom hom. ₁₁Dieselfde geld ook Jesus, wat Justus genoem word. Van diegene wat uit die besnydenis kom, is hulle die enigste medewerkers vir die •koninkryk van God, en hulle het 'n troos vir my geword. ₁₂Epafras, een van julle, 'n dienskneg van •Christus Jesus, stuur vir julle groete. Hy worstel voortdurend vir julle in sy gebede, dat julle volkome en met volle oortuiging staande mag bly in alles wat God wil. ₁₃Ek getuig van hom dat hy baie moeite doen vir julle en die mense in Laodisea en Hiërapolis. ₁₄Lukas, die geliefde dokter, en Demas groet julle. ₁₅Groet die broers in Laodisea, en ook Nimfa, en die •gemeente wat in haar huis bymekaarkom. ₁₆En wanneer hierdie brief by julle voorgelees is, sorg dat dit ook in die gemeente van Laodisea voorgelees word, en dat julle ook die brief wat van Laodisea af kom, voorlees. ₁₇Sê ook vir Argippus: “Let op die bedieningsopdrag wat jy van die Here ontvang het, sodat jy dit uitvoer.”

₁₈Dié groetwoord in my eie handskrif: Van Paulus. Dink aan my boeie.

Die genade bly met julle!