2 Makkabeërs 1

₁“Aan die Joodse broers in Egipte,

van die Joodse broers in Jerusalem en dié in die land Judea:

Gegroet en ware vrede.

₂“Mag God julle goed behandel

en mag Hy dink aan sy verbond met Abraham, Isak en Jakob, sy getroue diensknegte.

₃“Mag Hy aan julle almal 'n hart gee om Hom te aanbid en om sy wil te doen met 'n grootmoedige hart en 'n gewillige siel.

₄“Mag Hy julle hart open vir sy Wet en opdragte en mag Hy vrede skenk.

₅“Mag Hy julle gebede verhoor en met julle versoen word,

en mag Hy julle nie in kwade tye verlaat nie.

₆“Ons is nou hier en ons bid vir julle.

₇“Terwyl Demetrius regeer het, in die honderd-nege-en-sestigste jaar, het ons, die Judeërs, vir julle geskryf op die hoogtepunt van die verdrukking wat ons in hierdie jare te beurt geval het sedert Jason en sy mense teen die heilige land en die koninkryk in opstand gekom en ₈hulle die poort verbrand en onskuldige bloed vergiet het. Ons het die Here gesmeek en ons is verhoor. Ons het •brandoffers en •graanoffers gebring, die lampe aangesteek en die •vertoonbrode uitgesit. ₉Daarom moet julle nou die dae van die Huttefees in die maand Kislef vier, in die honderd-agt-en-tagtigste jaar.”

“Aan Aristobulus, uit die geslag van die gesalfde priesters en die leermeester van koning Ptolemeus,

aan die Judeërs in Egipte:

₁₀van die mense in Jerusalem, dié in Judea, die senaat en Judas:

“Gegroet en gesondheid.

₁₁“Omdat ons deur God uit groot gevare gered is toe ons ons teen die koning verset het, dank ons Hom innig, ₁₂want Hy het die mense wat in die heilige stad vyandig teenoor ons opgestel was, uitgedryf. ₁₃Toe die veldheer met sy skynbaar onoorwinlike mag in Persië aangekom het, is hulle in die tempel van Nanaia in stukke gekap nadat die priesters van Nanaia hulle mislei het. ₁₄Onder die voorwendsel om met haar te trou, het Antiogus met sy Vriende by die plek aangekom om soveel as moontlik van die skatte as bruidskat te bekom. ₁₅Maar nadat die priesters van die tempel van Nanaia die skatte uitgestal het en Antiogus met 'n handjievol manne deur die ringmuur van die heiligdom na binne gegaan het, het hulle, toe Antiogus ingegaan het, die tempel toegesluit. ₁₆Vervolgens het hulle die geheime deur van die plafon oopgemaak, die veldheer en sy volgelinge met klippe soos 'n weerligstraal neergevel, hulle onthoof en in stukke gekap, en die koppe vir die mense buite die tempel gegooi. ₁₇Ons God is in alles lofwaardig, Hy wat die goddeloses uitgelewer het om gestraf te word.

₁₈“Omdat ons van voorneme is om op die vyf-en-twintigste dag van Kislef die reiniging van die tempelterrein te herdenk, het ons dit as gepas beskou om julle daaroor in te lig, sodat ook julle die Huttefees en die Fees van Vuur mag vier. Nehemia het destyds die offers gebring nadat hy die tempelterrein en die brandofferaltaar herbou het.

₁₉“Want toe ons vaders na Persië weggevoer is, het godvresende priesters destyds in die geheim van die vuur van die brandofferaltaar geneem en dit weggesteek in die holte van 'n waterlose put, en die plek só beveilig dat dit vir almal onbekend gebly het. ₂₀Nadat baie jare verloop het, toe God dit goedgedink het, het Nehemia, deur die koning van Persië gestuur, die afstammelinge van die priesters wat die vuur weggesteek het, uitgestuur om die vuur te soek. Volgens wat aan ons meegedeel is, het hulle nie vuur gevind nie, maar slegs modderige water. Hy het hulle toe beveel om dit uit te skep en te bring. ₂₁Toe die dinge gebring is wat vir die offerande bestem was, het Nehemia die priesters beveel om die hout en dit wat daarop lê, met die water te besprinkel.

₂₂“Na hierdie gebeurtenis het daar 'n tyd verloop. Nadat dit 'n tyd lank bewolk was, het die son weer geskyn, en 'n groot vuur het ontvlam, sodat almal verbaas was. ₂₃Die priesters het gebid terwyl die offerande verteer word, die priesters en al die mense, met Jonatan wat begin en die ander wat antwoord, ook Nehemia. ₂₄Hierdie gebed was soos volg:

₃₀“Toe het die priesters lofgesange gesing. ₃₁Nadat die brandoffer uitgebrand was, het Nehemia beveel dat die oorblywende water op groterige klippe uitgegiet moet word. ₃₂Toe dit gebeur, het 'n vlam ontbrand, maar dit is uitgedoof deur 'n lig wat vanaf die altaar daarteen geskyn het.

₃₃“Toe hierdie gebeurtenis bekend geword het, is ook aan die koning van die Perse berig dat die water te voorskyn gekom het by die plek waar die weggevoerde priesters die vuur versteek het, die water waarmee Nehemia en sy mense die offer geheilig het. ₃₄Nadat hy ondersoek ingestel het na die gebeurtenis, het die koning daardie plek omhein en 'n heiligdom daar gebou. ₃₅Vir dié wat hy goedgesind was, het die koning 'n groot getal uitsonderlike geskenke geneem en aan hulle uitgedeel. ₃₆Nehemia en sy mense het dit Neftar genoem, wat ‘reiniging’ beteken, maar dit word nou deur die meeste mense Neftai genoem.”