Psalms 9

₂Ek wil die Here prys

met my hele hart;

ek wil van al u wonderdade vertel.

₃Ek wil bly wees

en my in U verheug;

ek wil u Naam besing, Allerhoogste.

₄Wanneer my vyande terugdeins,

struikel hulle en kom hulle om

vanweë u teenwoordigheid,

₅want U het my reg in my regsaak

gehandhaaf.

U het op die troon gesit

as 'n regverdige regter.

₆U het die nasies tereggewys,

die goddeloses vernietig;

hulle naam het U

vir altyd en ewig uitgewis.

₇Die vyand – hulle is tot niet,

puinhope vir goed.

Die stede het U ontwortel.

Die herinneringe aan hulle,

dit het verdwyn.

₈Die Here regeer vir ewig;

Hy vestig sy troon vir die regspraak.

₉Hý oordeel die wêreld

in •geregtigheid;

oor die nasies spreek Hy reg

met billikheid.

₁₀Die Here sal 'n toevlugsoord

wees vir die onderdrukte,

'n toevlugsoord in tye van nood.

₁₁Wie u Naam ken,

kan op U vertrou,

want U laat hulle wat U soek

nie in die steek nie, Here.

₁₂Besing die Here wat in Sion regeer;

maak sy dade onder die volke bekend.

₁₃Want Hy wat bloedvergieting vergeld,

dink aan die magteloses;

Hy vergeet nie hulle hulpgeroep nie.

₁₄Wees my genadig, Here,

kyk hoe my haters my verdruk –

U wat my kan wegruk

uit die poorte van die dood –

₁₅sodat ek van al u lofwaardige

dade kan vertel in die poorte

van die dogter van Sion.

Ek wil juig oor die verlossing

wat U bring.

₁₆Nasies het weggesink

in die vangkuil wat hulle

gemaak het;

in daardie vangnet wat hulle

gespan het,

is hulle voete gevang.

₁₇Die Here het Homself

bekend gemaak:

Hy laat reg geskied;

goddeloses raak

in hulle eie handewerk verstrik. Higgajoon •Sela

₁₈Goddeloses draai om na die •doderyk,

al die nasies wat God vergeet.

₁₉Maar die behoeftiges

sal nie vir altyd vergeet word nie;

die magteloses se hoop

is nie vir altyd verlore nie.

₂₀Staan op, Here,

mense moet nie die oorhand kry nie;

laat nasies voor U teregstaan.

₂₁Vervul hulle met vrees, Here;

die nasies moet besef

dat hulle net mense is. Sela