Psalms 64

₂Luister, o God, na my stem as ek kla;

hou my lewe veilig teen

die verskrikking van die vyand.

₃Hou my weg van die kring

van kwaaddoeners,

weg van die onrus van hulle

wat onreg pleeg,

₄dié wat hulle tonge

so skerp maak soos 'n swaard,

wat aanlê met hulle pyle

van bitter woorde

₅om uit wegkruipplekke

op 'n onskuldige te skiet.

Onverwags skiet hulle op hom.

Hulle is nie bang nie.

₆Hulle praat mekaar moed

in met bose woorde;

hulle spreek af om strikke te stel.

Hulle sê: “Wie sal dit raaksien?

₇Sal mense 'n bose opset ondersoek?

Ons is gereed;

dit is 'n fyn beplande set,

en 'n mens se binneste en hart

is onpeilbaar.”

₈Maar onverwags skiet God hulle

met 'n pyl;

hulle is gewond!

₉Dit bring hulle elkeen tot 'n val.

Hulle tonge getuig teen hulle.

Almal wat hulle sien, sidder.

₁₀Dan word alle mense met vrees vervul

en maak God se dade bekend;

hulle kry insig in sy werk.

₁₁Regverdiges sal hulle

in die Here verheug

en by Hom skuil.

Almal wie se harte opreg is,

sal in Hom roem.