Psalms 52

₃Waarom spog jy

oor 'n bose daad, krygsheld?

God se troue liefde is die hele dag daar.

₄Jou tong beplan vernietiging,

soos 'n skerp skeermes,

jy wat bedrog pleeg.

₅Jy hou meer van die slegte

as van die goeie,

van leuens meer

as om te sê wat reg is. •Sela

₆Jy hou van allerhande

lasterlike woorde,

van 'n tong wat bedrieg.

₇God sal jou daarom vir goed afbreek

Hy sal jou wegruk,

jou wegskeur uit die tent;

Hy sal jou uitpluk uit die land

van die lewendes. Sela

₈Regverdiges sal dit sien en ontsag hê,

oor hom sal hulle die spot dryf:

₉“Kyk die sterk man!

Hy het God nie sy toevlug gemaak nie,

maar op sy groot rykdom vertrou.

Hy soek toevlug in wat hom vernietig.”

₁₀Maar ek is soos 'n welige

olyfboom in God se huis;

ek stel my vertroue in God

se troue liefde,

vir altyd en altyd.

₁₁Ek sal U vir altyd prys

omdat U opgetree het.

In die teenwoordigheid

van u getroue volgelinge

vestig ek my hoop op u Naam,

want dit is goed.