Psalms 21

₂Here, die koning is bly

oor u beskerming;

hoe uitbundig juig hy

oor u verlossing.

₃Wat sy hart begeer,

het U vir hom gegee

en wat sy lippe verlang,

het U hom nie geweier nie. •Sela

₄Ja, U tree hom tegemoet

met goeie seëninge;

U sit 'n kroon van fyngoud op sy kop.

₅Lewe het hy van U gevra

en U het dit aan hom gegee,

'n lang leeftyd, vir altyd en ewig.

₆Hy geniet hoë aansien

deur die verlossing wat U bring;

luister en majesteit

verleen U aan hom.

₇Ja, U oorlaai hom vir altyd

met seëninge.

U maak hom baie bly

met u teenwoordigheid.

₈Omdat die koning vertrou

op die Here,

op die troue liefde van die Allerhoogste,

sal hy nie wankel nie.

₉U hand sal al u vyande vind.

U regterhand sal dié vind

wat u haat.

₁₀U maak van hulle 'n vurige oond

wanneer u verskyn.

Die Here sal hulle

in sy toorn verslind

en vuur sal hulle verteer.

₁₁Hulle vrug sal u uit die land

laat verdwyn

en hulle nageslag onder die mense.

₁₂Wanneer hulle boosheid bedink

teen u,

'n komplot smee,

sal hulle nie slaag nie;

₁₃want u sal hulle op die vlug

laat slaan

wanneer u op hulle aanlê

met 'n gespande boog.

₁₄Verhef U, Here, in u krag!

Ons wil sing, u mag wil ons besing.