Psalms 14

Dwase sê in hulle harte:

Daar is geen God nie.

Hulle tree gruwelik en afstootlik op.

Daar is nie een wat goed doen nie.

₂Die Here kyk vanuit die hemel

na die mense om te sien of daar

iemand is wat verstandig is,

iemand wat God soek.

₃Almal het afgedwaal,

saam het hulle ontaard;

daar is nie een wat goed doen nie,

selfs nie een nie.

₄Is almal wat onreg pleeg

dan sonder insig,

hulle wat my volk eet

soos 'n mens brood eet?

Hulle roep die Here nie aan nie.

₅Dan oorweldig skrik hulle,

want God is met die regverdige geslag.

₆Julle wil die planne

van die magtelose bespotlik maak,

maar die Here is sy skuilplek.

₇Mag daar uit Sion redding kom

vir Israel!

Wanneer die Here die lot

van sy volk omkeer,

moet Jakob juig,

moet Israel bly wees.