Spreuke 15

₁'n Sagte antwoord

keer woede weg,

maar 'n krenkende woord

laat toorn opvlam.

₂Die tong van wyses

maak kennis lofwaardig,

maar die mond van dwase

stort sotheid uit.

₃Op elke plek is die oë van die Here,

hulle hou slegtes en goeies dop.

₄Kalmte van die tong

is 'n boom van lewe,

maar verdorwenheid daarvan

breek die gees.

₅'n Sot versmaai die vermaning

van sy vader,

maar hy wat teregwysing

ter harte neem, is slim.

₆In die huis van 'n regverdige

is daar baie voorraad,

maar in die opbrengs van 'n goddelose

skuil daar teenspoed.

₇Die lippe van wyses

strooi kennis uit,

maar die hart van dwase

is nie so nie.

₈Die offer van goddeloses

is afstootlik vir die Here,

maar die gebed van opregtes

geniet sy goedkeuring.

₉Afstootlik vir die Here

is die pad van 'n goddelose,

maar wie geregtigheid nastreef,

vir hom is Hy lief.

₁₀'n Ernstige vermaning is gepas

vir hom wat die pad verlaat;

wie teregwysing haat, sal sterf.

₁₁Die •doderyk en die onderwêreld

lê oop voor die Here –

hoeveel te meer die harte

van mensekinders!

₁₂'n Spotter hou nie daarvan

as iemand hom teregwys nie;

na wyses sal hy nie gaan nie.

₁₃'n Vrolike hart

laat die gesig goed lyk,

maar by kommer in die hart

is die gees neerslagtig.

₁₄Die hart van 'n verstandige

soek kennis,

maar die monde van dwase

word gevoed met sotheid.

₁₅Al die lewensdae

van 'n magtelose is sleg,

maar vrolikheid van hart

is 'n voortdurende fees.

₁₆'n Bietjie, saam met ontsag

vir die Here,

is beter as 'n groot skat

met paniek daarby.

₁₇'n Porsie groente

met liefde daarby

is beter as 'n vetgevoerde bees

met haat daarby.

₁₈'n Opvlieënde man

sit 'n stryery aan die gang,

maar 'n geduldige mens

bring 'n geskil tot bedaring.

₁₉Die pad van 'n luiaard

is soos 'n doringheining

vol dorings,

maar die weg van opregtes is gebaan.

₂₀'n Wyse seun verbly sy vader,

maar 'n dwase mens minag

sy moeder.

₂₁Sotheid is 'n vreugde vir iemand

sonder verstand,

maar 'n skerpsinnige mens

loop 'n reguit pad.

₂₂Planne misluk waar daar

geen beraadslaging is nie,

maar met baie raadgewers

hou dit stand.

₂₃'n Mens ervaar vreugde

met die gepaste antwoord

uit sy mond;

ja, 'n woord op sy tyd –

hoe goed is dit nie!

₂₄Die weg na lewe lei opwaarts

vir 'n verstandige mens,

om so die doderyk daar onder

te ontwyk.

₂₅Die Here breek die huis

van hovaardiges af,

maar die gebied van 'n weduwee

baken Hy af.

₂₆Die planne van 'n bose mens

is vir die Here afstootlik,

maar vriendelike woorde is suiwer.

₂₇Wie onregverdige wins maak,

stort sy huis in die ongeluk,

maar hy wat omkoopgeskenke haat,

sal leef.

₂₈Die hart van 'n regverdige

oorweeg hoe om te antwoord,

maar die mond van goddeloses

stort booshede uit.

₂₉Die Here is ver van goddeloses,

maar die gebed van regverdiges

hoor Hy.

₃₀Helder oë verheug die hart,

'n goeie berig verfris die liggaam.

₃₁'n Oor wat luister

na die teregwysing van die lewe,

sal by wyses tuis wees.

₃₂Wie vermaning in die wind slaan,

verag sy eie lewe,

maar wie na teregwysing luister,

verkry verstand.

₃₃Ontsag vir die Here

is 'n vermaning tot wysheid,

en nederigheid gaan eer vooraf.