Spreuke 14

₁Die wyses onder vroue

bou elkeen haar huis,

maar sotheid breek dit eiehandig af.

₂Wie in sy opregtheid

die lewenspad loop,

het ontsag vir die Here,

maar hy wat op kronkelpaaie gaan,

verag Hom.

₃In die mond van 'n sot

is daar 'n slaanding

vir sy hoogmoed,

maar die lippe van wyses

beskerm hulle.

₄Waar geen beeste is nie,

is die voerkrip leeg;

maar groot is die opbrengste

deur die krag van 'n bul.

₅'n Betroubare getuie lieg nie,

maar 'n vals getuie ryg leuens uit.

₆'n Spotter soek wysheid,

maar daar is niks;

kennis is vir 'n verstandige maklik.

₇Bly weg van 'n dwase man;

jy sal nie lippe met kennis

leer ken nie.

₈Die wysheid van 'n slim mens

is om sy lewenspad te verstaan,

maar die sotheid van dwase is bedrog.

₉Sondeskuld maak 'n bespotting

van sotte,

maar tussen opregtes

is daar welwillendheid.

₁₀Die hart ken sy eie bitterheid,

en in sy vreugde kan 'n buitestander

nie deel nie.

₁₁Die huis van goddeloses

word verdelg,

maar die tent van opregtes gedy.

₁₂Daar is 'n pad

wat vir 'n mens reg lyk,

maar dit eindig by paaie na die dood.

₁₃Ook onder gelag

kan 'n hart pyn ervaar;

die einde van vreugde is verdriet.

₁₄Van sy eie optrede

kry 'n afvallige genoeg,

en 'n goeie man kry genoeg

van wat oor hom kom.

₁₅Onkundiges glo elke woord,

maar 'n slim mens

oorweeg sy voetstappe.

₁₆'n Wyse is versigtig

en vermy die kwaad,

maar 'n dwaas is humeurig

en vol selfvertroue.

₁₇Wie kort van humeur is,

begaan 'n sotheid,

en iemand met slinkse planne

word gehaat.

₁₈Onverstandiges erf sotheid,

maar slim mense dra kennis

as hoofbedekking.

₁₉Slegtes buig neer voor goeies,

en goddeloses by die poorte

van 'n regverdige.

₂₀Selfs deur sy medemens

word 'n arme gehaat,

maar die vriende van 'n ryke is baie.

₂₁Wie sy medemens verag, sondig;

maar wie medelye het

met magteloses, is gelukkig.

₂₂Is hulle wat kwaad beplan

nie op 'n dwaalspoor nie,

en is troue liefde en waarheid

nie bestem vir hulle

wat die goeie beplan nie?

₂₃In alle harde werk

is daar voordeel,

maar 'n blote gepraat

lei net tot gebrek.

₂₄Die kroon van wyses

is hulle rykdom;

die sotheid van dwase

is blote sotheid.

₂₅'n Betroubare getuie red lewens,

maar wie leuens uitryg, is bedrieglik.

₂₆In ontsag vir die Here

lê daar sterk vertroue,

en vir iemand se kinders

bied dit 'n skuilplek.

₂₇Ontsag vir die Here

is 'n bron van lewe,

sodat die vangstrikke van die dood

vermy kan word.

₂₈In 'n oorvloed van mense

lê 'n koning se luister,

maar in die afwesigheid van 'n volk,

lê 'n hooggeplaaste se ondergang.

₂₉Die geduldige mens

is ryk aan verstandigheid,

maar wie kort van humeur is,

stel sotheid ten toon.

₃₀'n Kalm hart gee lewe

aan die liggaam,

maar naywer is verrotting

in die gebeente.

₃₁Hy wat 'n arme uitbuit,

beledig sy Maker,

maar wie hom oor die behoeftige

ontferm, eer Hom.

₃₂Deur sy boosheid

word 'n goddelose omvergewerp,

maar 'n regverdige vind

'n skuilplek, selfs by sy dood.

₃₃In die hart van 'n verstandige

rus wysheid;

selfs onder dwase is dit bekend.

₃₄Geregtigheid verhoog 'n nasie,

maar sonde is 'n skande vir volke.

₃₅Die welwillendheid van die

koning is daar

vir 'n verstandige dienaar,

maar sy gramskap is bedoel

vir 'n skandemaker.