Markus 15

₁En dadelik, die oggend vroeg, het die leierpriesters met die familiehoofde, skrifkenners en die hele Sanhedrin beraadslaag. Hulle het Jesus toe geboei, weggeneem en aan •Pilatus uitgelewer. ₂Pilatus vra Hom toe: “Is u die koning van die Jode?” Hy antwoord hom: “U sê dit.” ₃Die leierpriesters het Hom van baie dinge beskuldig. ₄Pilatus vra Hom toe weer: “Antwoord u niks nie? Kyk hoeveel beskuldigings bring hulle teen u in!” ₅Maar Jesus het steeds niks geantwoord nie, sodat Pilatus verwonderd was.

₆Tydens elke fees het hy vir hulle, op hulle versoek, een gevangene vrygelaat. ₇Daar was 'n man met die naam Barabbas, wat gevange geneem is saam met die rebelle wat moord gepleeg het tydens 'n opstand. ₈Die skare het na •Pilatus gegaan en gereedgemaak om te vra dat hy soos gewoonlik sal optree. ₉Pilatus vra hulle toe: “Wil julle hê dat ek vir julle die koning van die Jode vrylaat?” ₁₀Hy het immers geweet dat die leierpriesters Hom uit afguns oorgelewer het. ₁₁Die leierpriesters het die skare egter opgestook dat hy eerder Barabbas vir hulle moet vrylaat. ₁₂Pilatus het hierop gereageer en weer vir hulle gevra: “Wat wil julle dan hê moet ek doen met hom wat julle die koning van die Jode noem?” ₁₃Hulle het opnuut geskreeu: “Kruisig hom!” ₁₄Pilatus vra toe vir hulle: “Watter kwaad het hy dan gedoen?” Maar hulle het nog harder geskreeu: “Kruisig hom!” ₁₅Pilatus wou die skare tevrede stel, en het Barabbas vir hulle vrygelaat. Maar Jesus het hy laat gesel en oorgelewer om gekruisig te word.

₁₆Die soldate het Hom weggelei, die paleis, naamlik die pretorium, binne, en die hele kohort soldate byeengeroep. ₁₇Toe trek hulle vir Hom 'n purperrooi mantel aan, en sit vir Hom 'n doringkroon op wat hulle gevleg het, ₁₈en begin Hom spottend groet: “Gegroet, koning van die Jode!” ₁₉Hulle het Hom herhaaldelik met 'n riet oor die kop geslaan, op Hom gespoeg, en knielend aan Hom eer bewys. ₂₀En nadat hulle Hom bespot het, het hulle die purperrooi mantel afgehaal en sy boklere vir Hom aangetrek. Hulle lei Hom toe weg om Hom te kruisig.

₂₁Hulle het 'n verbyganger, 'n sekere Simon van Sirene, wat van die platteland gekom het, die vader van Aleksander en Rufus, gedwing om sy kruis te dra. ₂₂Hulle bring Jesus toe na die plek Golgota, wat, as dit vertaal word, ‘Kopbeenplek’ beteken. ₂₃Hulle wou Hom wyn, gemeng met mirre, gee, maar Hy het dit nie geneem nie. ₂₄Toe kruisig hulle Hom

₃₃Toe die sesde uur aanbreek, het dit oor die hele aarde donker geword tot die negende uur toe. ₃₄Op die negende uur het Jesus met 'n harde stem uitgeroep: “Eloï, Eloï, lemá sabagtáni?” wat, as dit vertaal word, beteken, ‘My God, my God, waarom het U My verlaat?’ ₃₅Toe sommige van die omstanders dit hoor, sê hulle: “Kyk, hy roep Elia.” ₃₆Iemand het gehardloop, 'n spons met suur wyn deurweek, dit op 'n riet gesit en vir Hom gehou om te drink, met die woorde: “Wag, laat ons sien of Elia kom om hom af te haal.” ₃₇Jesus het met 'n harde stem uitgeroep en sy asem uitgeblaas. ₃₈Die voorhangsel in die heiligdom is in twee geskeur, van bo tot onder. ₃₉Toe die centurio, wat reg oorkant Hom gestaan het, Hom sy asem so sien uitblaas, sê hy: “Hierdie man was werklik •Seun van God!” ₄₀Daar was ook vroue wat op 'n afstand gekyk het, onder wie Maria Magdalena, Maria, die moeder van die jong Jakobus en Joses, en Salome. ₄₁Dit is die vroue wat Hom, toe Hy in Galilea was, gevolg en bedien het. Baie ander vroue wat saam met Hom na Jerusalem gegaan het, was ook daar.

₄₂Toe dit reeds laat geword het, en aangesien dit die Voorbereidingsdag was, die dag voor die Sabbat, ₄₃het Josef van Arimatea, 'n vooraanstaande lid van die Raad, wat ook uitgesien het na die •koninkryk van God, na •Pilatus gegaan. Hy het moed bymekaargeskraap en die liggaam van Jesus gevra. ₄₄Pilatus was verbaas dat Hy al dood was, en het die centurio laat roep en hom gevra of Hy reeds 'n geruime tyd dood was. ₄₅Toe hy dit by die centurio verneem het, het hy die lyk vir Josef gegee. ₄₆Josef het toe 'n linnedoek gekoop, en Hom, nadat hy Hom van die kruis afgehaal het, in die linnedoek toegedraai en neergelê in 'n graf wat in 'n rots uitgekap was, en 'n klip teen die ingang van die graf gerol. ₄₇Maria Magdalena en Maria, die moeder van Joses, het gesien waar Hy neergelê is.