Matteus 27

₁Teen dagbreek het al die leierpriesters en die familiehoofde van die volk teen Jesus 'n besluit geneem om Hom dood te maak. ₂Hulle het Hom toe geboei, weggelei en aan •Pilatus, die prokurator, uitgelewer.

₃Toe Judas, sy verraaier, sien dat Hy veroordeel is, het hy berou gekry. Hy het toe die dertig silwerstukke na die leierpriesters en familiehoofde teruggeneem ₄en gesê: “Ek het gesondig deur onskuldige bloed te verraai.” Hulle het egter gesê: “Wat het dit met ons te doen? Jy moet maar self toesien.” ₅Hy het toe die silwerstukke in die •tempel neergegooi, weggegaan en homself gaan ophang. ₆Die leierpriesters het die silwerstukke geneem en gesê: “Dit is nie toelaatbaar om dit in die skatkis te gooi nie, aangesien dit bloedgeld is.” ₇Hulle het toe 'n besluit geneem, en met die geld die grond van die pottebakker aangekoop as 'n begraafplaas vir •vreemdelinge. ₈Daarom word daardie grond tot vandag toe Bloedgrond genoem. ₉Toe is die uitspraak van die profeet Jeremia vervul: “Hulle het die dertig silwerstukke, die prys waarteen Hy deur die kinders van Israel gewaardeer is, geneem ₁₀en dit vir die grond van die pottebakker gegee, net soos die Here my beveel het.”

₁₁Jesus het voor die prokurator verskyn, en die prokurator het Hom ondervra: “Is u die koning van die Jode?” Jesus sê toe: “U sê dit.” ₁₂Die hele tyd wat Hy deur die leierpriesters en familiehoofde beskuldig is, het Hy niks geantwoord nie. ₁₃Daarop sê •Pilatus vir Hom: “Hoor u nie wat hulle alles teen u getuig nie?” ₁₄Hy het hom egter op geen enkele woord geantwoord nie, sodat die prokurator uitermate verwonderd was.

₁₅By elke fees het die prokurator die gebruik gehad om vir die skare een gevangene van hulle eie keuse vry te laat. ₁₆Hulle het in daardie stadium 'n berugte gevangene aangehou met die naam Jesus Barabbas. ₁₇Toe die skare byeen was, het •Pilatus vir hulle gevra: “Wie wil julle hê moet ek vir julle vrylaat, Jesus Barabbas of Jesus wat as Christus bekend staan?” ₁₈Want hy het geweet dat hulle Hom uit naywer oorgelewer het. ₁₉Terwyl hy op die regbank sit, het sy vrou 'n boodskap na hom gestuur: “Jy moet niks te doen hê met daardie •regverdige man nie, want ek het vannag in 'n droom baie oor hom verduur.” ₂₀Die leierpriesters en die familiehoofde het die skare egter oorreed dat hulle op Barabbas moes aandring, en dat hulle Jesus moes laat doodmaak. ₂₁Die prokurator het hulle weer gevra: “Wie van die twee wil julle hê moet ek vir julle vrylaat?” Hulle het geroep: “Barabbas!” ₂₂Pilatus vra hulle toe: “Wat moet ek dan maak met Jesus wat as Christus bekend staan?” Hulle roep toe almal uit: “Laat Hy gekruisig word!” ₂₃Hy het gevra: “Maar watter kwaad het hy dan gedoen?” Hulle het egter nog harder geskreeu: “Laat Hy gekruisig word!” ₂₄Toe Pilatus sien dat hy niks bereik nie, maar dat daar eerder 'n oproer kom, het hy water geneem en voor die skare sy hande gewas en gesê: “Ek is onskuldig aan die bloed van hierdie man. Julle moet maar self toesien.” ₂₅Die hele volk het geantwoord: “Laat sy bloed op ons en ons kinders kom!” ₂₆Daarop het hy Barabbas vir hulle vrygelaat, maar Jesus het hy laat gesel, en toe oorgelewer om gekruisig te word.

₂₇Toe het die soldate van die prokurator vir Jesus na die pretorium saamgeneem, en die hele kohort soldate by Hom byeengebring. ₂₈Hulle het sy klere uitgetrek en 'n helderrooi mantel om Hom gehang. ₂₉Nadat hulle 'n kroon van doringtakkies gevleg het, het hulle dit op sy kop gesit, en 'n riet in sy regterhand. Hulle het voor Hom gekniel en met Hom die spot gedryf: “Gegroet, koning van die Jode!” ₃₀Hulle het op Hom gespoeg en die riet geneem, en Hom herhaaldelik op sy kop geslaan. ₃₁Nadat hulle met Hom gespot het, het hulle die mantel afgehaal, sy boklere vir Hom aangetrek en Hom weggelei om Hom te kruisig.

₃₂Op pad na buite het hulle 'n man van Sirene met die naam Simon teëgekom. Hulle het hierdie man gedwing om Jesus se kruis te dra. ₃₃Toe hulle by 'n plek kom met die naam Golgota, wat ‘Kopbeenplek’ beteken, ₃₄het hulle vir Hom wyn, gemeng met 'n giftige kruid, gegee om te drink. En toe Hy dit proe, wou Hy dit nie drink nie. ₃₅Nadat hulle Hom gekruisig het, het hulle sy boklere verdeel deur daaroor te loot. ₃₆Daarna het hulle daar gaan sit en Hom bewaak. ₃₇Bo sy kop het hulle die aanklag teen Hom aangebring, wat gelui het:

₄₁Net so het ook die leierpriesters saam met die skrifkenners en familiehoofde die spot gedryf en gesê: ₄₂“Ander het hy gered, homself kan hy nie red nie. Hy is die koning van Israel, laat hy nou afkom van die kruis, en ons sal in hom glo. ₄₃Hy het op God vertrou, laat Hy hom nou red as Hy wil. Hy het immers gesê: Ek is die Seun van God.” ₄₄Op dieselfde manier het ook die rowers wat saam met Hom gekruisig is, Hom beledig.

₄₅Vanaf die sesde tot die negende uur het daar duisternis oor die hele aarde toegesak. ₄₆Teen ongeveer die negende uur het Jesus met 'n harde stem uitgeroep: “Eli, Eli, lemá sabagtáni?” Dit beteken ‘My God, my God, waarom het U My verlaat?’ ₄₇Toe sommige van dié wat daar staan, dit hoor, het hulle gesê: “Hy roep na Elia.” ₄₈Dadelik het een van hulle nader gehardloop, 'n spons geneem, dit in suur wyn geweek, op 'n riet gesit, en vir Hom gegee om te drink. ₄₉Maar die ander het gesê: “Wag, laat ons sien of Elia hom kom red.” ₅₀Toe het Jesus weer met 'n harde stem uitgeroep en sy asem uitgeblaas. ₅₁En kyk, die voorhangsel in die heiligdom is van bo tot onder in twee geskeur, die aarde is geskud en die rotse is oopgebreek. ₅₂Die grafte is geopen en baie liggame van ontslape •heiliges is opgewek. ₅₃Hulle het ná sy opstanding uit die grafte gekom, die Heilige Stad binnegegaan en aan baie verskyn. ₅₄Toe die centurio en dié wat Jesus saam met hom bewaak het, die skudding en die dinge wat gebeur, sien, was hulle vreesbevange en het gesê: “Hy was werklik •Seun van God.” ₅₅Daar was baie vroue teenwoordig wat van ver af toegekyk het. Dit was vroue wat Jesus van Galilea af gevolg en Hom gedien het. ₅₆Onder hulle was Maria Magdalena, Maria, die moeder van Jakobus en Josef, en die moeder van die seuns van Sebedeus.

₅₇Toe dit laat geword het, het 'n ryk man van Arimatea, met die naam Josef, daar aangekom. Ook hy was 'n dissipel van Jesus. ₅₈Dié man het •Pilatus genader en die liggaam van Jesus gevra. Toe het Pilatus beveel dat dit gegee word. ₅₉Josef het die liggaam geneem, dit toegedraai in 'n skoon linnedoek ₆₀en neergelê in die nuwe graf wat hy vir homself in die rots laat uitkap het. Hy het toe 'n groot klip voor die ingang van die graf gerol en weggegaan. ₆₁Maria Magdalena was daar, ook die ander Maria, en hulle het teenoor die graf bly sit.

₆₂Die volgende dag – dit is die dag ná Voorbereidingsdag – het die leierpriesters en die •Fariseërs by •Pilatus byeengekom ₆₃en gesê: “Meneer, ons het onthou dat toe hy nog geleef het, daardie bedrieër gesê het, ‘Ná drie dae sal Ek weer opgewek word.’ ₆₄Beveel dan dat die graf tot op die derde dag beveilig word, sodat sy dissipels hom nie gaan steel en vir die volk sê, ‘Hy is opgewek uit die dood!’ nie. Die laaste dwaling sal erger wees as die eerste.” ₆₅Pilatus het vir hulle gesê: “Julle kry 'n wag van soldate. Gaan beveilig die graf soos julle goeddink.” ₆₆Hulle het toe gegaan en die graf beveilig deur die klip te verseël en die wagte daar te plaas.