Klaagliedere van Jeremia 3

₁Ek is die man wat ellende beleef het

deur die slae van die Here se gramskap.

₂Hy het my gedryf,

my in die donker laat loop, sonder lig.

₃Ja, Hy het sy hand teen my gelig,

telkens weer, die hele dag.

₄Hy het my vleis en vel verteer,

my bene gebreek.

₅Hy het my beleër,

my omring met bitterheid en moeite.

₆Hy het my in donker plekke laat bly

soos dié wat lankal dood is.

₇Hy het 'n muur rondom my gebou,

uitkom kan ek nie;

Hy het my boeie van brons swaar gemaak.

₈Selfs al skree ek en roep om hulp,

sluit Hy Hom af vir my gebed.

₉Met gekapte klip het Hy my pad toegebou,

Hy het my paaie laat kronkel.

₁₀Hy is 'n beer wat my voorlê,

'n leeu in skuilplekke.

₁₁Hy het my paaie verlê, my braak laat lê,

my 'n woesteny gemaak.

₁₂Hy het sy boog gespan,

my as teiken opgestel vir die pyl.

₁₃Die pyle uit sy koker

het Hy in my niere laat indring.

₁₄Ek word uitgelag deur al my mense;

hulle spotlied klink heeldag op.

₁₅Met bitter kruie het Hy my versadig,

my in oormaat wildeals laat drink.

₁₆Hy het my tande op gruis laat afslyt;

Hy het my in die as vertrap.

₁₇Vrede is my ontneem,

die goeie het ek vergeet.

₁₈Ek het gesê: My toekoms

en my hoop op die Here het verdwyn.

₁₉Dink aan my nood

en my swerwersbestaan,

aan die wildeals en gif.

₂₀Wanneer ek diep daaroor nadink,

raak ek terneergedruk.

₂₁Dít roep ek in herinnering,

daarom het ek hoop:

₂₂Dit is deur die troue liefde

van die Here dat ons

nie omgekom het nie,

ja, sy ontferming ken geen einde nie.

₂₃Dit is elke oggend weer nuut –

groot is u getrouheid.

₂₄My erfdeel is die Here, sê ek;

daarom hoop ek op Hom.

₂₅Goed is die Here

vir hulle wat op Hom wag,

vir die mens wat na Hom soek.

₂₆Goed is dit om stil te hoop

op die verlossing van die Here.

₂₇Goed is dit vir 'n jong man

om 'n juk in sy jeug te dra.

₂₈Hy moet alleen sit in stilte,

want die Here het dit op hom gelê.

₂₉Hy moet maar sy gesig in die stof hou;

miskien is daar hoop.

₃₀Hy moet sy wang draai

na dié wat hom slaan;

laat hy versadig word van skande.

₃₁My Heer verwerp beslis nie

die mens vir ewig nie;

₃₂maar as Hy iemand bedroef het,

ontferm Hy Hom met die volle omvang

van sy troue liefde.

₃₃Hy verdruk en bedroef

mensekinders teen sy sin.

₃₄Dat al die gevangenes

van die aarde vertrap word;

₃₅dat die reg van 'n mens

voor die Allerhoogste geskend word;

₃₆dat enige mens se regsaak verydel word –

sien my Heer dit nie?

₃₇Wie sê iets en dit gebeur

as my Heer dit nie gebied het nie?

₃₈Kom sowel die goeie as die slegte

nie uit die mond van die Allerhoogste nie?

₃₉Wat kla 'n mens terwyl hy nog leef,

'n jong man oor die straf op sy sonde?

₄₀Laat ons ons handelswyse

ondersoek en toets,

en laat ons na die Here terugkeer.

₄₁Laat ons ons harte saam met

ons hande ophef na God

in die hemel.

₄₂Ons het oortree;

ons was opstandig.

U het ons nie vergewe nie.

₄₃U het U in toorn gehul

en ons agtervolg;

U het genadeloos doodgemaak.

₄₄U het U afgeskerm met 'n wolk

waardeur geen gebed kan dring nie.

₄₅Uitvaagsels en vullis

het U ons gemaak onder die volke.

₄₆Al ons vyande

het hulle mond vol oor ons.

₄₇Angs en afgrond het ons lot geword,

verwoesting en ineenstorting.

₄₈Uit my oë vloei strome water

oor die ineenstorting

van die dogter van my volk.

₄₉Sonder onderbreking,

sonder einde, bly my trane loop,

₅₀totdat die Here uit die hemel

neerkyk en dit sien.

₅₁Hoe pynlik om al die dogters

van my stad so te sien!

₅₂Verbete en sonder rede

het my vyande my soos 'n voël gejag.

₅₃Hulle het my lewe

in 'n opgaarput uitgedoof

en klippe op my gegooi.

₅₄Die water het tot oor my kop gestyg

en ek het gedink ek is verlore.

₅₅Ek roep u naam, o Here,

uit die diepste put.

₅₆U het my stem gehoor.

Moet tog nie u ore sluit

vir my geroep om uitkoms nie.

₅₇U het na my toe gekom

op die dag toe ek na U geroep het.

U het gesê: “Moenie bang wees nie.”

₅₈U, my Heer, het my regsaak behartig;

U het my lewe gered.

₅₉U, Here, het die onreg

wat my aangedoen is, gesien;

lewer 'n regverdige uitspraak oor my.

₆₀U het al hulle wraakgierigheid gesien,

al hulle planne vir my.

₆₁U het hulle uittarting gehoor, Here,

al hulle planne teen my,

₆₂alles wat oor my teenstanders se lippe kom,

en hulle geskinder oor my die hele dag.

₆₃Of hulle sit en of hulle opstaan,

kyk tog, hulle spotlied gaan oor my.

₆₄U, o Here, sal hulle

volgens die werke

van hulle hande vergeld.

₆₅U maak hulle harte onbeskaamd;

mag u vloek oor hulle kom!

₆₆U sal hulle in toorn vervolg

en hulle uitroei onder die hemel van die Here.