Job 40

₂“Omgord maar jou heupe soos 'n man!

Ek sal jou ondervra,

lig jy My dan in!

₃Wil jy werklik my beslissings dwarsboom,

My skuldig verklaar,

sodat jy gelyk kan hê?

₄Of het jy 'n arm soos dié van God?

Kan jy soos Hy jou stem laat donder?

₅Tooi jou dan met majesteit en aansien;

klee jou met luister en glans.

₆Laat jou woedebuie oral uitbars;

sien elkeen raak wat verwaand is

en verneder hom.

₇Sien elkeen raak wat verwaand is

en dwing hom op sy knieë.

Vertrap goddeloses net daar

waar hulle is.

₈Verberg hulle saam in die stof.

Hou hulle gevange in die verborgene.

₉Selfs Ek sal jou dan prys,

omdat jou regterhand

jou te hulp gekom het.

₁₀“Kyk na Behemoot,

wat Ek gemaak het,

soos Ek jou ook gemaak het.

Hy eet gras soos 'n bees.

₁₁Kyk na die krag in sy kruis.

En sy manlike krag,

dit is in die spiere van sy buik.

₁₂Hy maak sy stert styf soos 'n seder,

die senings van sy dye is ineengevleg.

₁₃Sy gebeente is bronspype,

sy bene soos ysterstawe.

₁₄Hy is die voortreflikste van God se werke;

Hy wat hom gemaak het,

het sy swaarde verskaf.

₁₅Ja, die opbrengs van die berge

word na hom aangedra,

daar waar al die diere

van die veld baljaar.

₁₆Onder lotusbome lê hy,

in 'n skuilplek van riete en moeras.

₁₇Lotusbome bedek hom met skaduwee;

rivierwilgers omring hom.

₁₈Kyk, die rivier kan maar afkom,

hy gee nie haastig pad nie;

hy bly rustig,

al stu die Jordaan teen sy bek.

₁₉Sal iemand hom aan sy oë beetpak,

met stokke sy neus deurboor?

₂₀“Kan jy 'n leviatan aan 'n hoek intrek,

met 'n tou sy tong

onder bedwang bring?

₂₁Kan jy 'n biesie deur sy neus sit,

met 'n doring sy wang deurboor?

₂₂Sal hy baie smeekbedes tot jou rig,

of saggies met jou praat?

₂₃Sal hy 'n ooreenkoms met jou sluit,

dat jy hom as lewenslange slaaf neem?

₂₄Kan jy met hom speel soos met 'n voël,

hom vasbind vir jou dogters?

₂₅Sal handelsvennote oor hom onderhandel,

hom tussen handelaars verdeel?

₂₆Kan jy sy vel vol harpoene steek,

en sy kop vol visspiese?

₂₇As jy jou hand op hom plaas,

sal jy die geveg onthou;

jy sal dit nie weer doen nie.

₂₈Kyk, enige verwagting

om hom te vang, is misplaas.

Sal selfs net sy voorkoms

nie 'n mens laat neerslaan nie?