Jeremia 41

₁In die sewende maand het Ismael, seun van Netanja, seun van Elisama, verwant aan die koninklike familie en hoofamptenare van die koning, met tien manne saam met hom, by Gedalja, seun van Agikam, in Mispa aangekom. Terwyl hulle daar in Mispa saam geëet het, ₂het Ismael, seun van Netanja, en die tien manne wat by hom was, opgestaan en Gedalja, seun van Agikam, seun van Safan, met die swaard neergevel en hom doodgemaak – hy wat deur die koning van Babilonië in die land aangestel is. ₃Ook al die Judeërs wat by hom, Gedalja, in Mispa was, en die Galdeërs wat hulle daar bevind het, die krygsmanne, is deur Ismael neergevel.

₄Die tweede dag ná die moord op Gedalja, terwyl niemand dit nog geweet het nie, ₅het daar tagtig manne uit Sigem, Silo en Samaria aangekom wat hulle baarde afgeskeer, hulle klere geskeur en hulleself stukkend gekerf het. Hulle het graanoffers en wierook by hulle gehad met die doel om dit na die huis van die Here te neem. ₆Ismael, seun van Netanja, het hulle al huilend uit Mispa tegemoetgegaan. Toe hy by hulle kom, sê hy vir hulle: “Kom in na Gedalja, seun van Agikam!” ₇Maar net toe hulle in die middel van die dorp kom, het Ismael, seun van Netanja, hulle vermoor en hulle in 'n opgaarput gegooi, hy en die manne by hom. ₈Maar tien van die manne onder hulle het vir Ismael gesê: “Moet ons nie doodmaak nie, want ons het weggesteekte voorrade in die veld – koring, gars, olyfolie en heuning.” Toe het hy daarvan afgesien, en hulle nie saam met hulle volksgenote doodgemaak nie. ₉Die opgaarput waarin Ismael al die lyke van die manne wat hy langs Gedalja neergevel het, gegooi het – dit was die opgaarput wat koning Asa gemaak het weens die bedreiging van Baesa, koning van Israel. Ismael, seun van Netanja, het dit met die gesneuweldes volgemaak.

₁₀Daarna het Ismael almal wat van die volk oorgebly het, wat in Mispa was, in gevangenskap weggevoer – die dogters van die koning en al die mense wat in Mispa oorgebly het, oor wie Nebusaradan, die •aanvoerder van die lyfwag, vir Gedalja, seun van Agikam, aangestel het. Ismael, seun van Netanja, het hulle weggevoer en vertrek om oor te trek na die Ammoniete.

₁₁Maar toe Joganan, seun van Kareag, en al die bevelvoerders van die leërafdelings wat by hom was, hoor van al die kwaad wat Ismael, seun van Netanja, aangerig het, ₁₂het hulle al die manne geneem en gegaan om teen Ismael, seun van Netanja, te veg. Hulle het hom aangetref by die groot dam by Gibeon. ₁₃Toe al die mense wat by Ismael was, vir Joganan, seun van Kareag, en al die bevelvoerders van die leërafdelings by hom, sien, was hulle bly. ₁₄Al die mense wat deur Ismael uit Mispa as gevangenes weggevoer is, het omgedraai, teruggekeer en na Joganan, seun van Kareag, gegaan. ₁₅Maar Ismael, seun van Netanja, het met agt manne van Joganan af weggekom en na die Ammoniete gegaan.

₁₆Joganan, seun van Kareag, en al die bevelvoerders van die leërafdelings by hom, het almal wat van die volk oorgebly het, saamgeneem, almal wat hy van Ismael, seun van Netanja, uit Mispa teruggebring het, nadat dié vir Gedalja, seun van Agikam, neergevel het. Dit was die mans, krygsmanne, vroue en kinders en eunugs wat hy uit Gibeon teruggebring het. ₁₇Hulle het vertrek en oorgebly by Gerut-Kimham naby Betlehem, om van daar af verder te gaan en Egipte te bereik, ₁₈weg van die Galdeërs af; want hulle was bang vir hulle. Ismael, seun van Netanja, het immers vir Gedalja, seun van Agikam, vir wie die koning van Babilonië in die land aangestel het, neergevel.