Esegiël 22

₁Die woord van die Here het tot my gekom: ₂“En jy, mensekind, sal jy regspreek, sal jy regspreek oor die stad van bloed? Maak aan haar al haar afstootlike dade bekend. ₃Jy moet sê, ‘So sê my Heer, die Here:

₁₃“ ‘ “Kyk, Ek slaan my hande saam oor die onregverdige wins wat jy gemaak het en oor die bloedskuld wat daar in jou midde is. ₁₄Sal jou hart standhou of jou hande sterk bly in die tyd wanneer Ek teen jou optree? Ek, die Here, het gepraat, en Ek gaan optree. ₁₅Ek gaan jou versprei onder die nasies, jou verstrooi in die lande; Ek gaan jou onreinheid volledig uit jou verwyder. ₁₆Wanneer jy deur jou eie toedoen ontheilig word voor die nasies, sal jy besef dat Ek die Here is.” ’ ”

₁₇Die woord van die Here het tot my gekom: ₁₈“Mensekind, die huis van Israel het vir my metaalskuim geword; hulle almal is die koper, tin, yster en lood wat in 'n smeltoond agterbly. Metaalskuim van silwer het hulle geword. ₁₉Daarom, so sê die Heer, die Here, ‘Omdat julle almal metaalskuim geword het, daarom, kyk, in Jerusalem gaan Ek julle saamgooi. ₂₀Silwer, koper, yster, lood of tin word in 'n smeltoond saamgegooi om vuur daarteen aan te blaas, sodat dit smelt. So sal Ek julle saamgooi in my toorn en woede, julle ingooi en julle laat smelt. ₂₁Ek sal julle bymekaarmaak en die vuur van my gramskap teen julle aanblaas, en julle sal in die stad smelt. ₂₂Soos silwer in 'n pot gesmelt word, so sal julle in die stad gesmelt word. Dan sal julle besef dat Ek, die Here, my woede oor julle uitgestort het.’ ”

₂₃Die woord van die Here het tot my gekom: ₂₄“Mensekind, sê vir die land, ‘Jy is 'n land wat nie rein verklaar kan word nie, wat op die dag van vervloeking sy reën nie kry nie, ₂₅wie se leiers in hom soos brullende leeus is wat 'n prooi verskeur – lewens verslind hulle; skatte en kosbaarhede vat hulle; weduwees in die land maak hulle meer.’ ₂₆Sy priesters doen my wet geweld aan; hulle ontheilig wat vir My heilig is; tussen wat heilig en wat onheilig is, maak hulle geen onderskeid nie; die verskil tussen rein en onrein maak hulle nie bekend nie. Vir my Sabbatte sluit hulle die oë, en my heiligheid word aangetas onder hulle. ₂₇Die •hoë amptenare van die land is in hom soos wolwe wat 'n prooi verskeur – om bloed te vergiet en lewens te vernietig, sodat hulle onregverdige wins kan maak. ₂₈Sy profete pleister alles vir hulle toe met kalk: Hulle sien vals visioene en voorspel leuens. Hulle sê altyd, ‘So sê my Heer, die Here,’ terwyl die Here nie gepraat het nie. ₂₉Die volk van die land buit mense uit en beroof hulle. Die magteloses en behoeftiges verdruk hulle, en vreemdelinge pers hulle af asof hulle geen regte het nie.

₃₀“Ek het onder hulle iemand gesoek wat 'n klipmuur kan pak en wat voor My in die bres kan tree vir die land, sodat Ek dit nie verwoes nie, maar Ek kon niemand kry nie. ₃₁Daarom stort Ek my verontwaardiging oor hulle uit; met die vuur van my gramskap vernietig Ek hulle. Ek laat hulle optrede op hulle koppe neerkom.” Dit is die uitspraak van my Heer, die Here.