Psalms 128

Dit gaan goed met almal wat die Here dien,

almal wat lewe soos Hy wil hê.

₂As jy dit doen en as jy hard werk,

dan sal jy genoeg hê om van te lewe.

Dit sal goed gaan met jou,

en jy sal ryk word.

₃Jou vrou in jou huis sal wees

soos 'n wingerdstok wat baie druiwe dra.

Jou kinders by jou tafel sal wees

soos jong olyfboompies.

₄Jy moet onthou, dit is hoe die Here

die persoon sal seën wat Hom dien.

₅Ek bid dat die Here in Sion jou sal seën.

Ek bid dat jy sal sien

dat dit goed gaan met Jerusalem,

so lank soos jy lewe,

₆en dat jy jou kinders se kinders sal sien.

Ek bid dat Jerusalem vrede sal hê.