Psalms 120

Toe dit sleg gegaan het met my,

het ek geroep en gevra

dat die Here my moet help,

en Hy het my geantwoord.

₂Ek het gevra: “Here, U moet my red

van mense wat lieg en bedrieg.”

₃Julle wat vir ander mense bedrieg,

weet julle hoe die Here julle sal straf?

₄Hy sal julle straf met die skerp pyle van soldate,

met die warm kole vuur van besembos-hout.

₅Dit gaan sleg met my,

want dit voel of ek in die land Mesek woon

of tussen die tente van die land Kedar.

₆Ek het baie lank gewoon tussen mense

wat nie hou van vrede nie, te lank.

₇Ek wil vrede hê, maar wanneer ek oor vrede praat,

dan wil hulle oorlog hê.