Numeri 33

₁Hier is 'n lys van die plekke waar die Israeliete elke maal gekom het toe hulle uit Egipte gegaan het. Hulle het in groepe gegaan, en Moses en Aäron het hulle gelei. ₂Die Here het gesê Moses moet die name opskryf van die plekke van waar hulle elke maal verder gegaan het, en Moses het dit gedoen. Hier is 'n lys van die plekke: ₃Hulle het op die vyftiende dag van die eerste maand van Raämses verder gegaan. Dit was die oggend ná die Paasfees. Die Here het hulle gelei, en al die Egiptenaars het gestaan en kyk toe hulle weggaan. ₄Die Egiptenaars was toe besig om hulle oudste seuns te begrawe. Die Here het die oudste seuns laat sterf, en Hy het hulle gode gestraf. ₅Die Israeliete het van Raämses verder gegaan en hulle het hulle tente opgeslaan by Sukkot. ₆Hulle het van Sukkot verder gegaan en hulle het hulle tente opgeslaan by Etam, langs die woestyn. ₇Van Etam het hulle teruggegaan na Pi-Hagirot, by Baäl-Sefon, en hulle het hulle tente opgeslaan by Migdol. ₈Hulle het verder gegaan van Pi-Hagirot, hulle het deur die see na die woestyn van Etam gegaan en ná drie dae het hulle toe hulle tente opgeslaan by Mara. ₉Van Mara het hulle verder gegaan en by Elim gekom. Daar was twaalf fonteine en 70 palmbome. ₁₀Hulle het van daar verder gegaan en hulle het hulle tente opgeslaan by die Riet-see, en daarna ₁₁in die Sin-woestyn, ₁₂by Dofka, ₁₃by Alus, ₁₄en by Refidim. By Refidim was daar nie water vir die volk om te drink nie. ₁₅Van Refidim het hulle verder gegaan en hulle het hulle tente opgeslaan in die Sinai-woestyn, ₁₆toe by Lus-grafte, ₁₇Gaserot, ₁₈Ritma, ₁₉Rimmon-Peres, ₂₀Libna, ₂₁Rissa, ₂₂Kehelata, ₂₃Sefer-berg, ₂₄Garada, ₂₅Makhelot, ₂₆Tagat, ₂₇Terag, ₂₈Mitka, ₂₉Gasmona, ₃₀Moserot, ₃₁Bene-Jaäkan, ₃₂Gor-Gidgad, ₃₃Jotbata, ₃₄Abrona, ₃₅Esjon-Geber, ₃₆en in die Sin-woestyn, by die stad Kades. ₃₇Hulle het van Kades verder gegaan en hulle het hulle tente opgeslaan by Hor-berg, langs die land Edom. ₃₈Die priester Aäron het teen Hor-berg opgegaan en hy het daar gesterf. Die Here het gesê hy moet daar sterf. Dit was op die eerste dag van die vyfde maand in die veertigste jaar nadat die Israeliete uit Egipte gekom het. ₃₉Aäron was 123 jaar oud toe hy op Hor-berg gesterf het. ₄₀Die koning van Arad was 'n Kanaäniet. Hy het gehoor dat die Israeliete in sy land gekom het. Hy het in die Suid-land gewoon, in die land Kanaän. ₄₁Die Israeliete het van Hor-berg verder gegaan en hulle het hulle tente opgeslaan by Salmona, ₄₂toe by Punon, ₄₃Obot, ₄₄Ije-Abarim in die land Moab, ₄₅Dibon-Gad, ₄₆Almon-Diblatajim, ₄₇die Abarim-berge by Nebo, ₄₈en in die Moab-vlakte naby die Jordaan-rivier, oorkant die stad Jerigo. ₄₉Hulle het hulle tente opgeslaan naby die Jordaan-rivier, van die stad Bet-Jesimot tot by Abel-Sittim in die Moab-vlakte.

₅₀Die Here het met Moses gepraat in die Moab-vlakte, by die Jordaan-rivier oorkant die stad Jerigo. Die Here het vir Moses gesê: ₅₁“Jy moet met die Israeliete praat en vir hulle sê: Wanneer julle oor die Jordaan-rivier gaan na die land Kanaän, ₅₂dan moet julle al die mense wegjaag wat in die land woon. Julle moet hulle beelde stukkend slaan, die klip-beelde en die metaal-beelde, en julle moet hulle offer-plekke verwoes. ₅₃Dan moet julle die land vir julle vat en julle moet daar gaan woon, want Ek het die land vir julle gegee, julle moet dit kry. ₅₄Julle moet lootjies trek en julle moet die land verdeel tussen julle families. Julle moet vir 'n groot familie 'n groot stuk grond gee en vir 'n kleiner familie 'n kleiner stuk grond. Elke persoon moet die grond kry wat die lootjie sê. Elke stam moet sy eie grond hê. ₅₅En as julle nie die mense wegjaag wat in die land woon nie, dan sal daardie mense wat julle laat oorbly, vir julle wees soos dorings in julle oë en soos skerp penne in julle heupe. Hulle sal julle laat swaarkry in die land waar julle woon. ₅₆En dan sal Ek die slegte dinge aan júlle doen wat Ek aan hulle wou doen.”