Numeri 17

₁Die Here het vir Moses gesê: ₂“Praat met die Israeliete en vra vir elke stamhoof 'n kierie, jy moet een kierie van elke stamhoof kry, daar moet twaalf kieries wees. Jy moet elkeen se naam op sy kierie skryf ₃en jy moet Aäron se naam op die Levi-familie se kierie skryf, want daar moet een kierie wees vir elke stamhoof. ₄Dan moet jy die kieries neersit in die tent waar Ek aan die Israeliete verskyn, jy moet dit sit voor die kis waarin die tien gebooie is en waar Ek aan julle verskyn, ₅Ek sal 'n man kies om priester te wees, en sy kierie sal takkies en blare kry. So sal Ek die Israeliete laat ophou om altyd vir julle te beskuldig.”

₆Moses het toe met die Israeliete gepraat, en elke leier het vir hom 'n kierie gegee. Daar was twaalf kieries, een kierie vir elke leier, en Aäron se kierie was ook daarby. ₇Moses het die kieries voor die Here neergesit in die tent waarin die tien gebooie is. ₈Toe Moses die volgende dag in die tent kom, was daar takkies en blare aan Aäron se kierie. Daar het blomme uitgekom, en die kierie het ryp amandels gedra. ₉Moses bring toe die kieries uit die tent na die Israeliete toe. Hulle het na die kieries gekyk, en elke leier het sy eie kierie geneem. ₁₀En die Here het vir Moses gesê: “Jy moet Aäron se kierie terugsit voor die kis waarin die tien gebooie is. Dit moet daar bly om 'n teken te wees vir opstandige mense. Hulle moet weet dat as hulle nie ophou om vir julle te beskuldig nie, dan sal hulle sterf.”

₁₁Moses het gedoen wat die Here vir hom gesê het. ₁₂En toe sê die Israeliete vir Moses: “Ons sal sterf! Ons sal almal sterf! Nie een van ons sal oorbly nie. ₁₃Elke persoon wat naby die tempel-tent van die Here kom, sal sterf. Hoekom moet ons almal sterf?”